Óleıin dep jatqan ıt telefonmen kómek shaqyrǵan
ASTANA. 30 naýryz. QazAqparat - Ulybrıtanııada basset-haýnd tuqymyna jatatyn ıt telefonnyń symyna oratylyp qalyp, ózi sol telefon arqyly kómek shaqyrǵan, dep jazady The Sun.
Qalaı ekeni belgisiz, ol qutqarý qyzmetiniń «999» degen nómirin tergen. Tutqanyń arǵy jaǵyndaǵy operator qyryldaǵan daýysty estip, telefon nómiri arqyly úıdiń meken-jaıyn anyqtaǵan jáne jaqyn mańdaǵy polıtsııa qyzmetkerlerin kómekke jibergen.
Atalmysh úıge tez arada jetken tártip saqshylary esikti eshkim ashpaǵan soń, syndyryp kirmek bolady. Alaıda sol kezde úıdiń kórshisi - Pol Ýoker kele qalyp, qosalqy kiltpen ashyp beredi. Polıtseıler kórshimen birge úıge kirip, kómek suraǵan «jandy» izdeýge kirisedi. Bir-eki bólmeni tintkennen keıin, kórshi qonaq bólmede telefon symyna oralyp, qylqynyp óleıin dep jatqan Djordjty (ıttiń aty) taýyp alady. Ol dereý symdy qıyp, ıtti bosatyp jiberedi.
Bolǵan oqıǵa týraly úıdiń ıeleri Stıv Braýn men onyń qyzy Lıdııa jumystarynan oralǵan soń ǵana bildi. Lıdııanyń aıtýynsha, Djordjtyń qutqarý qyzmetiniń nómirin terýi Qudaıdyń saqtaǵany kórinedi. «Áıtpese ol anaý aıtqandaı aqyldy da emes. Ózi azdap aqymaqtaý, jalqaýlaý, sonymen qatar, shulyq shaınap jata berýdi unatady», - deıdi «Qudaı saqtaǵysh» ıttiń ıesi.
