Ólemin nemese óltiremin: Berdenov isinde kýáger sotta ne aıtty
ShYMKENT. KAZINFORM — Shymkent qalasy ákiminiń orynbasary Rýslan Berdenovke jasalǵan qastandyqqa qatysty qylmystyq is boıynsha sot tyńdalymy jalǵasyp jatyr.
Kezekti otyrysta Shymkent qalalyq sáýlet jáne qurylys bóliminiń ınspektory qyzmetin atqarǵan Asanbaı Ahmentaev kýáger retinde jaýap berdi.
Onyń aıtýynsha, jınalystarda Rýslan Berdenov bólim qyzmetkerlerine jumysty taza ári sapaly atqarý qajettigin únemi eskertip júrgen.
— 3 sáýir kúni biz birge kirdik. Sol jerde úsheýmiz otyrdyq. Alǵashqyda Rýslan Arysbekuly Ernar Jıembaıdyń qyzmettik formasyna eskertý jasady. Keıin prezentatsııany kórgennen keıin, «jumystaryń osy ma», — dedi. Basqarma basshysy bolsyn, basqa salalarmen jınalys ótkizgende de «taza jumys jasańdar, áıtpese antıkor tekseris júrgizedi» dep eskertý jasaıtyn. Bul joly da sondaı talap aıtty. Sodan Ernarǵa «bulaısha jumys isteıtin bolsań, jumysty qoıa salshy. Maǵan jumys isteıtin adam kerek. Ekeýmiz jumys istese almaımyz. Ótinish jaz» — dedi. Ol kelisimin berdi, — dedi Asanbaı Ahmentaev.
Alaıda 14 sáýir kúni jaǵdaı shıelenise túsken. Kýágerdiń aıtýynsha, sol kúni tústen keıin Ernar Jıembaı Asanbaı Ahmentaevqa birneshe ret qońyraý shalǵan.
— Toqtamaı qońyraý shaldy. Alǵashqyda ala almadym. Arasynda alǵanda daýsynan onyń ashýly, tipti mas kúıde sııaqty sezindim. Maǵan: «Men bireýdi óltiremin nemese ólemin. Rýslandy bir mınýtqa úı jaǵynan alyp shyqshy, jigitshe sóıleseıin, — dedi. Men bul sózderdi baıyppen qabyldaǵan joqpyn, — dedi ol.
Bul derekti Rýslan Berdenovtyń kómekshisi Talap Rahymberdıev te rastady. Onyń aıtýynsha, Ernar «Ólemin nemese óltiremin, ekeýiniń biri bolady» — degen.
Berdenov muny estigende: «Ne úshin óledi, ne úshin olaı aıtyp jatyr? Ólip qalmasyn baıqańdar» — degen.
Sot protsesi jalǵasyp jatyr.
Aıta keteıik, budan buryn Rýslan Berdenovke jasalǵan qastandyq týraly is sotqa joldanǵanyn jazǵan bolatynbyz.
21 sáýirde Shymkent ákiminiń orynbasary Rýslan Berdenovke qastandyq jasalǵany málim bolǵan. Ol jaraqat alyp, aýrýhanaǵa tústi.
Rýslan Berdenov aqpan aıynyń sońynda Shymkent qalasy ákiminiń orynbasary qyzmetine taǵaıyndalǵan.