Óle-ólgeninshe meshit qurylysyna qarsy bolǵan jazýshy
ASTANA. 30 qazan. QazAqparat - Ótken jumada talaı jylǵa sozylǵan aıtys-tartystan soń Italııanyń Toskanı aımaǵynda musylmandardyń taǵy bir qulshylyq úıi boı kóterdi. Musylmandar qulshylyq etetin meshitten bólek onda mádenı-dinı ortalyq ta jumys isteıtin bolady.
Atalmysh meshit qurylysy tóńireginde daý talaı jylǵa sozylyp, tek bıylǵy jyly ǵana óz sheshimin tapty. Bir qyzyǵy, jergilikti jazýshy Orıana Fallachı bul meshittiń boı kóterýine óle-ólgeninshe qarsylyq tanytyp, narazylyq bildirýmen bolǵan edi. «Men bul meshitti kórgim de kelmeıdi. Ol Toskanıdegi meniń úıime jaqyn ornalasqan. Týǵan ólkemde otyryp, bıiktigi 24 metrge jetetin meshit munarasyn kórgim kelmeıdi. Óıtkeni, musylman elderinde aıshyqty da, Іnjildi de ózińmen birge alyp júre almaısyń»,- dep tóndire sóılep, jala jaýyp, bul meshitti jaryp jiberetinin aıtyp, ses kórsetken edi, dep jazady muslim.kz.
Qudaı úıiniń qurylysyna úzildi-kesildi qarsy bolǵan Fallachı 2006 jyly bul ómirmen qoshtasyp, baqıǵa attandy. Kórer jaryǵy taýsylmaǵanda onyń bul jańalyqty qalaı qarsy alaryn kim bilsin?!
Ózderine kósem sanap, kórneki tulǵanyń qataryna qosqan jazýshysymaq áıeldiń arandatýǵa bastaıtyn sózderine arqalanǵan jergilikti turǵyndar jaýyzdyqtyń qandaı túrine bolsa da daıyn edi. Degenmen, túrli qastandyqtarǵa qaramastan, Kolle Val d'Elza qalashyǵynda búginde meshit munaralary menmundalap tur. Meshit turǵyzylǵan aýmaqty jergilikti musylmandar jamaǵaty 99 jylǵa jalǵa alǵan. Onyń ashylý saltanatyna nanym-senimi ózge jergilikti turǵyndardyń bári shaqyryldy.
«Bul oryn - beıbitshilik sımvolyna aınalýy tıis»,- deıdi jergilikti musylmandar jamaǵatynyń jetekshisi Feras Jabarın.
