Óldige sanaǵan qaryndasy 20 jyldan soń aǵasyna qońyraý soqty

Asylbektiń aıtýynsha, onyń týǵan-týystary úıdiń kenjesi - Janerkeniń (aty ózgertildi) jaryq dúnıede bar ekendiginen kúder úzgen. Ózi de aýyq-aýyq eske alyp otyratyny bolmasa, endi ony kóremin dep oılamaǵan. Alaıda, kúni keshe 20 jylǵa jýyq ýaqyt buryn aıdyń-kúnniń amanynda kóz jazyp qalǵan kenje qaryndasy qońyraý shalyp, «Aǵa, men barmyn, tirimin» degende tóbesinen jaı túskendeı kúı keshken.

Janerke 1984 jyly dúnıege kelgen eken. 1991 jyly ákesi Shaıahmet Burqanuly Qazaqstanǵa Mońǵolııadan alǵashqy kóshti bastap keledi. Ol kisiniń úsh joǵary bilimi bar, Mońǵol elinde túrli memlekettik laýazymdy qyzmetter atqarǵan. Anasy  Ǵazıza Halhaǵanqyzy joǵary bilimdi dáriger. Ǵazıza men Shaıahmetten 4 bala týady: Jandos, Záýresh, Asylbek  jáne Janerke. 

1996 jyly sáýir aıynda anasy Ǵazıza Kókshetaý oblysy (sol kezdegi ataý - red.) Volodarovka aýdany Dáýqara aýylynda bas dáriger bolyp júrip, kenet kóz jumady. Odan soń Shaıahmet Burqanuly bala-shaǵasymen Kókshetaý qalasyna kóship kelip Kókshetaý ýnıversıtetinde, «Alash» qoǵamdyq qozǵalysynyń ortalyq apparatynda jumys isteıdi.

2001 jyly 9-synyp bitirgen Janerke Kókshetaýdaǵy qazaq pedagogıkalyq kolledjine oqýǵa qujat tapsyrýǵa ketip, sol kúıi odan habar bolmaıdy. Týǵan-týystary «Barmysyń, baýyrym!», «Jdı menıa» syndy kóptegen baǵdarlamalar arqyly, Іshki ister organdary arqyly izdestiredi, biraq esh nátıje shyqpaıdy. 2-3 jyldan soń ómir aǵymymen izdeý jumystary da saıabyrsı bastaıdy. Kele-kele ol tiri degen de úmit úziledi. Alaıda, 17 jyldan soń óldige sanalǵan Janerke aǵasyn ózi taýyp alǵan.

«Keshe, ıaǵnı 1 sáýir kúni anamyz Ǵazıza marqumnyń rýhyna quran baǵyshtap otyrǵan sátte qaryndasymyz habarlasyp, óziniń tiri ekenin, bar ekenin aıtty. Aýzyma sóz túspeı, ne derimdi bilmeı qaldym. 1 sáýirdiń qaljyńy ma dep te oıladym. Alaıda qonaqtarym ketken soń sóılese kele onyń bar taǵdyryn bildim», - deıdi Asylbek.

Málim bolǵandaı, Janerke úıden ketken jolynda bir dos qyzymen Astana qalasyna barady. Jastyqpen «jumysqa turyp, óz betimmen kún kórem» degen sheshim qabyldaıdy. Keıin jaqyndary ony izdestire bastaǵanda Almatyǵa qashyp ketedi. Almatyda jol kólik oqıǵasyna ushyrap, 1,5 jyl emdeledi. Sol jyldary qyzdarmen birge avtokólik urlyǵyn jasap, 3 jylǵa sottalyp ketedi.

Túrmeden shyqqan soń Talǵar aýdanynda bir qoıshy jigitke turmysqa shyǵyp, 2,5 jyldan soń ortaq bala bolmaǵandyqtan ajyrasady. 

Qazirgi ýaqytta Janerke Almaty qalasynda jumys isteıdi eken. Birer kún buryn áleýmettik jelide otyryp, oıda-joqta naǵashy ápkesiniń paraqshasyn taýyp alady. Sodan barlyq týystarynyń nomerlerin alyp, habarlasa bastaıdy. Aqyry marqum anasynyń ómirge kelgen kúninde aǵasymen tildesedi.

Bizdiń keıipker atyn  ózgertip alǵan kórinedi. Sol sebepti ishki ister organdarynyń izdeý jumystary nátıje bermegen.

Jaqyn kúnderi 20 jylǵa jýyq bir-birin kórmegen aǵaly-qaryndasty ekeý kezdespek...