Olar janyn berse de, syryn bermegen batyrlar

ASTANA. QazAqparat - Esterińizde bolsa, elimizde alǵashqy lańkestik oqıǵa 2011 jyly Aqtóbe qalasynda oryn alǵan bolatyn. Mamyr aıynda Ulttyq qaýipsizdik komıteti ǵımaratynyń aldynda ózin-ózi jaryp jibergen sol oqıǵadan 25 jasar jankeshtiniń ózi mert bolyp, 3 adam jaralanǵan edi. Sol kúnge deıin biz álemdegi teris aǵym jeteginde ketkenderden keletin zulymdyq ataýly Qazaqstanymyzdy aınalyp ótedi dep oılap, alańsyz kelgen edik. Biraq, sol oqıǵa basqa elderdegi sııaqty terrorıstik qaýip bizdiń elimizge tóne bastaǵanyn ańǵartty.

Jalpy, Vıkıpedııa málimetterine súıensek, 2011-2012 jyldary elimiz boıynsha túrli dárejedegi 9 terrorlyq akt jasalypty. Erekshe qatigezdikpen jasalǵan terrorlyq qylmystyń birin biz bıyl bastan ótkerdik.

2016 jyly 5 maýsymda oryn alǵan Aqtóbedegi oqıǵa qaımana qazaqty qaıta dúr silkindirdi. Ókinishke oraı, bul joly Otan aldyndaǵy boryshyn atqarǵan atpaldaı azamattar men beıbit turǵyndar kóz jumdy.

Áskerı bólimshege shabýyl

5 maýsym kúni Eset batyr kóshesiniń boıynda ornalasqan Ulttyq gvardııanyń №6655 áskerı bólimine terrorlyq top basa kóktep kiredi. Ańshy myltyǵymen jáne sýyq qarýlarmen qarýlanǵan top músheleriniń basty maqsaty áskerı bólimshedegi qarý-jaraq qoımasyn taýyp, tonaý bolatyn.

Qoımanyń ornalasqan jerin bilý maqsatymen qylmyskerler áskerı qyzmetin atqaryp júrgen jedel qyzmettegi jaýynger Dosbol Erkinbekuly men Shaısultan Aqjoldy ustap alyp, azaptaıdy. Biraq mardymdy jaýap ala almaǵan radıkaldy top músheleri olarǵa oq jaýdyryp, saldarynan 19 jasar jaýynger Dosbol Erkinbekuly aıaǵy men basyna tıgen oqtan sol jerde jan tapsyrady.

Kóp uzamaı, atys bolyp jatqan jerge aǵa serjant Ǵabıt Baljanov pen qatardaǵy jaýynger Denıs Chernyshov jáne Syrym Súndetov shuǵyl jetip, qarsylyq kórsetkenimen, jaýyngerlerdiń sany qaskóılerden áldeqaıda az edi. Osyny paıdalanǵan terrorlyq top músheleri Syrym Súndetovti qolǵa túsirip, qoıma týraly málimetterdi aıtýyn talap etip, azapqa salady. Saldarynan jaýynger Súndetov denesiniń 8 jerinen pyshaq jaraqatyn alsa, Denıs Chernyshov bolsa atylǵan oqtan aýyr jaralanady.

Keıinnen arnaıy maqsattaǵy batalonnyń avtokólik vzvodynyń aǵa júrgizýshisi, serjant Rahmet Satybaı óziniń áriptesi Chernyshovtiń erligin bylaı eske alǵa edi:

«Qaskóılerdiń jymysqy oıy sol kúni jaýyngerlik qyzmette bolǵan áriptesterimniń jan alyp, jan berisýiniń arqasynda júzege aspaı qaldy. Men bul jerde aldymen qatardaǵy sarbazdar Avdeev pen Chernyshov terrorıstermen jata-jastana shaıqasty. Chernyshov aýyr jaralanǵanyna qaramaı, janqııarlyqpen atysqanyn óz kózimmen kórdim. Áriptesterimniń osyndaı ábjil áreketteriniń arqasynda áskerı bólimge jasalǵan shabýyldyń joly kesilip, elge tóngen asa zor qaýiptiń aldy alyndy. Biz júktelgen mindetterdi abyroımen atqarǵanymyzdy maqtan tutamyz», - deıdi ol.

Budan keıin oqıǵa ornyna 16 áskerı qyzmetker kelip qosylǵan. Asqan janqııarlyqpen qarsylyq tanytýynyń arqasynda jáne olardyń keıbireýleri radıkaldy top jeteginde ketken sanasyzdarmen bolǵan qaqtyǵysta jaraqat alǵanyna qaramaı, rýhtary synbady ári óz mindetterin abyroımen atqardy.

Alaıda, oqıǵa saldarynan jedel qyzmettegi jaýynger Dosbol Sapar oqıǵa ornynda qaza tapty. Al qatardaǵy jaýynger Shaısultan Aqjol men Syrym Súndetovtiń ólim qaýpi tónip tursa da, qoımanyń ornalasqan jerin qylmyskerlerge aıtpaı, erlikpen ses kórsetýi keıingi urpaqqa zor úlgi, ónege bolatyndyǵyn atap ótken jón.

Demek, adam týmysynan qaharman, batyr bolyp týmaıdy. Bul minez óse kele qalyptasady. №6655 áskerı bólimshedegi azamattardyń erligi men áreketteri óskeleń urpaqqa úlgi. Endeshe, bizdiń sarbazdarymyz - búgingi kúnniń aıbynyn asqaqtaǵan erjúrek batyrlary.