Olar erlik jasady - Birtanov qaza tapqan dárigerler týraly
ALMATY. QazAqparat - QR DSM basshysy Eljan Birtanov qaza bolǵan dárigerdiń otbasyna qaıǵyryp kóńil aıtty, dep habarlaıdy QazAqparat tilshisi.
«Qazaqstan medıtsınasy aýyr qazaǵa ushyrady. Qyzmet atqarý ústinde eki dárigerimiz kóz jumdy. Kásibı bilikti dárigerler - gınekologııa men akýsherlik iste 20 jyldyq tájirıbesi bar medıtsına ǵylymdarynyń doktory Patsaev Talǵat Ánapıuly men reanımatsııa salasynda 30 jyldyq tájirıbesi bar, professor, medıtsına ǵylymdarynyń doktory Jánibek Artyqbaev óz isiniń has mamany bolatyn. Olar bosanǵannan keıin aýyr jaǵdaıda jatqan áıeldi qutqarý jolynda óz ómirlerin qıdy.
Jaqynda ǵana barsha álem halyqaralyq dárigerler kúnin atap ótken bolatyn. DDU,«Shekarasyz dáriger» uıymynyń bastamasymen atap ótiletin mereke adam densaýlyǵyn saqtaýda dárigerlerdiń ólsheýsiz rólin kórsetýge baǵyttalǵan.
Kúndelikti bizdiń dárigerler qalada ıa aýylda, kúndiz-túni adam ómirin arashalap qalý jolynda tynbaı eńbek etip keledi.
Ózgeniń ómirin saqtaımyn dep ózderi kóz jumǵan dárigerlerimizdiń aldynda basymdy ıemin.
Bul biz úshin orny tolmas qaıǵyly jaǵdaı.
Barlyq medıtsına mamandarynyń atynan qaza bolǵan dárigerlerdiń otbasyna, ekıpaj músheleriniń otbasyna qaıǵyryp kóńil aıtamyn. Menińshe, olar erlik jasady», - dedi mınıstr Feısbýktegi paraqshasynda.
Aıta ketý kerek, kúni keshe ǵana Almatydan əýege kóterilgen shaǵyn avıatsııa ushaǵy apatqa ushyraǵan edi. Almaty oblysy aýmaǵynan tabylǵan áýe kemesiniń bortynda eki ushqysh pen úsh dáriger bolǵan. Olardyń máıiti ushaq qulaǵan jerden tabyldy.
Dárigerler OQO-daǵy jas bosanǵan, aýyr jaǵdaıdaǵy áıeldi qaraýǵa shuǵyl attanǵan.
