Ol jaqta ólim úırenshikti nárse – Sırııadan oralǵan áıel
Derekti fılmde Aıda Amangeldi atty 1995 jyly Qazyǵurt aýdanynda týǵan áıeldiń taǵdyry baıandalady. «Ým ıshaq» dinı laqap atyn ıemdengen ol Shymkenttegi dinı medresede bir jyl kóleminde dinı bilim alǵan. Otbasy múshelerimen 2015 jyldyń 31 tamyzynda «Shymkent-Antalııa» áýe baǵytymen Túrkııa arqyly Sırııa aýmaǵyna ótip, DAISh uıymyna qosylǵan. QR Qylmystyq kodeksiniń 256-baby 1-tarmaǵy boıynsha qylmystyq is qozǵalyp, Interpol baǵyty boıynsha halyqaralyq izdeý jarııalanǵan.
Sırııa aýmaǵyna jetisimen sol jerde ákesiniń qalaýymen sodyr Abý Zeıd al-Azerıge turmysqa shyqqan. Aıda taıaýda Túrkistan oblystyq sotynyń sheshimimen 5 jylǵa bas bostandyǵynan aıyryldy.
«Bizge Ystanbulda Sırııaǵa barýǵa kómektesetin Osman degen adamdy jiberdi. Ystambulda bir jarym aıdaı boldyq ta, Sırııaǵa 16 qazanda kirdik. Ákem men aǵamnyń yqpalymen sol jaqqa kettik qoı. Biraq, bizge ol jaqta soǵys dep aıtqan joq edi. Bizdiń úıde ákemniń aıtqany – zań. Bizden barasyń ba, barmaısyń ba dep suramaıtyn da. 1997 jyly týǵan namaz oqymaıtyn inimdi ákem qınap alyp ketken. Sosyn sol jaqta ázerbaıjandyq lezgınge turmysqa shyqtym. Kúıeýim qatal ári qyzǵanshaq bolǵandyqtan, úıden shyqqan joqpyn. Aýyrdym. Eki márte balam ishimde shetinep ketti. Bomba... Úılerimizdiń arasy eki podez ǵana bolsa da, anama jibermeıtin. Eshkimmen aralastyrmaı, eshqaıda shyǵarmaıtyn. Tek úıde enemniń qasynda otyratynmyn. Búgin ólem be, erteń ólem be degen qorqynyshpen ómir súrdik», - deıdi ol.
Qazaqstannan barǵan áıeldiń aıtýynsha, kúnde qaıtalanatyn bombalaýdan erteńgi ómirge degen úmit te joqqa aınalatyn kórinedi.
«Sondaı jerden aman-esen kelip turmyn. Júre almaı, tósekte jattym. Ol jaqta tamaq joq. Jata beretinmin. Bir jerde jasyryn turdyq. Qashtyq. DAISh-tyń adamdarynan. Sebebi, qaıtam degenderdi darǵa asyp tastaıtyn. Bir kúni olar úıge kirip kelip, inimniń bireýin alyp ketti. Ekinshisin qyzdyń kıimin kıgizip aman alyp qaldyq. Alyp ketken inim úsh jarym aı sol jerde túrmede otyrdy. Ózderiniń túrmesi bar. «DAISh durys emes» degen adamdar ne darǵa asyldy, ne túrmege jabyldy», - deıdi ol.
24 jastaǵy áıel Sırııaǵa barǵanyna ókinetinin aıtady.
«Ol jaqqa bara salysymen bárimizdi soǵysýǵa májbúr etti. Ákem úlken kisi edi. 14 jasar inimmen birge soǵysýǵa májbúrledi. Ol jaqta soǵyspasań, eń jaman adam bolasyń. Bári saǵan jaman qaraıtyn. Keıin ólim qarapaıym úrdis bolyp qaldy. Tanıtyn adamdaryń shetinen óle beredi. Ókinem ákemderdiń joqtyǵyna. Asharshylyq kórdik. Shóp jedik. Qansha kún ash júrgen kezder boldy. Ol jaq – kirseń shyǵa almaıtyn jer. Ákem qorshaýda qalyp, kóz jumdy. Anam júregine oq tıip, qaıtys boldy», - deıdi ol.
