«Óli taldardy da sýaryp jatyr»: Atyraýda TShO-nyń kógaldandyrý jumysyna syn aıtyldy
ATYRAÝ. KAZINFORM — Atyraýda qoǵam belsendileri «Teńizshevroıl» kompanııasyna júktelgen kógaldandyrý jumysyna syn aıtty. Olardyń sózinshe, Geolog yqshamaýdanyndaǵy 11 gektar aýmaqta egilgen taldardyń keıbiri qýrap, aramshóp basqan. Al merdiger mekeme ókili shóptiń topyraqty qorǵaýda mańyzy bar ekenin aıtyp, júrgizilip jatqan jumysty túsindirdi.
Qoǵam belsendileri Geolog yqshamaýdanyndaǵy aýmaqty aralap, egilgen aǵashtardyń jaǵdaıymen tanysty. Olardyń aıtýynsha, munda 9300-den astam tal otyrǵyzylǵanymen, keıbir kóshetter qýrap qalǵan.
— Bul jerde taldarǵa kútim óte tómen. Ólip qalǵan taldar kóp. Ólip qalsa da ony sýaryp jatyr. Muny toqtatý kerek. Prezıdenttiń sýdy únemdeý týraly tapsyrmasy bar. Bul jerde baqylaý bolýy kerek. Aramshóptiń bárin qurtý qajet. Munda agronom kerek, — dedi Atyraý qalalyq máslıhatynyń depýtaty Rýslan Kúmisqalıev.
Merdiger mekeme ókiliniń aıtýynsha, aýmaqta úıeńki, akatsııa, robınııa, qaraǵash, sondaı-aq shamamen 600 órik jáne 600 alma aǵashy bar. Qazir munda shóp shabý jumysy júrgizilip jatyr. Kúzde aǵashtardy óńdep, tyńaıtqysh sebý josparlanǵan.
Merdiger ókili aramshóptiń bolýy aǵashtarǵa mindetti túrde keri áser etedi degen pikirmen kelispeıdi. Onyń aıtýynsha, shóp topyraqty kóleńkelep, ylǵaldyń saqtalýyna yqpal etedi. Shabylǵan shóptiń tamyry keıin shirip, gýmýsqa aınalady.
— Biz tamshylatyp sýarý júıesin qoldanamyz. Bir aǵashqa saǵatyna shamamen 80 lıtr sý beriledi. Al shóp tabıǵı kóleńke qalyptastyrady. Ony shapqan kezde tamyry topyraqta qalady. Ýaqyt óte kele tamyrlar shirip, gýmýsqa aınalady. Bul topyraqtyń qunarly qabatyn qalyptastyryp, erozııanyń aldyn alýǵa kómektesedi, — dedi merdiger mekeme ókili Damır Tazabekov.
Aıta keteıik, ákimdik pen «Teńizshevroıl» arasynda jasalǵan memorandým aıasynda osy aýmaqqa egilgen aǵashtardy merdiger kompanııa 2028 jylǵa deıin kútip-baptaýǵa tıis.
«Teńizshevroıl» ókiliniń aıtýynsha, kelisimshart boıynsha aǵashtardyń shyǵymdylyǵy 100 paıyz bolýy kerek. Qýraǵan aǵashtyń barlyǵy aýystyrylyp, ornyna jańasy otyrǵyzylady.
— Merdiger ár ólgen taldy aýystyryp, jańa tal egýge mindetti. Bul jumys aǵashtar uıqyǵa ketkennen keıin, kúzde júrgiziledi. Biz merdiger kompanııany jumys istep jatyr dep, baqylaýsyz qaldyrmaımyz. Aı saıyn kelip, tekserip turamyz. Únemi baqylaýda, — dedi «Teńizshevroıl» JShS Úkimetpen jáne jurtshylyqpen baılanys bóliminiń keńesshisi Nuraddın Ómirbaev.
Kompanııa budan bólek Jylyoı aýdanynda da 2022 jyldan beri kógaldandyrý jumystaryn júrgizip keledi. Alaıda qýań jer men ystyq klımatqa baılanysty ondaǵy aǵashtardyń shyǵymy tómen bolǵan. «Teńizshevroıl» kelisimshart talaptaryna sáıkes, qýraǵan aǵashtardy merdiger aýystyrýǵa mindetti ekenin atap ótti.
Eske salaıyq, mamyr aıynda prokýratýra TShO, NCOC, Embimunaıgaz jáne AMÓZ men Atyraý oblysy ákimdigi arasyndaǵy memorandýmnyń oryndalýy 0,4 pen 18,5 paıyz aralyǵynda ekeni málimdedi. Kompanııa ókilderiniń biri kórsetkishtiń tómen bolýyn 2 jyl burynǵy tasqynmen baılanystyrsa, ekinshisi ákimdik bólip bergen ýchaskelerge aǵash jersinbedi dep otyr.
