Ol óz elin saǵynyp júr - Lýkashenko Qyrǵyzstannyń burynǵy prezıdenti týraly
ASTANA. KAZINFORM – Belarýs prezıdenti Aleksandr Lýkashenko tilshilerdiń suraqtaryna jaýap bere otyryp, Qyrǵyzstannyń burynǵy prezıdenti týraly pikir bildirdi, dep habarlaıdy BelTA.
Belarýs basshysynyń aıtýynsha, Qurmanbek Bakıev «qatty qınalyp jatyr jáne óz elin saǵynyp júr».
Lýkashenko Belarýs pen Qyrǵyzstan arasyndaǵy tamasha qarym-qatynasty atap ótti.
- Eń bastysy, biz Keńes odaǵy kezinde aramyzda bolǵannyń bárin saqtap qaldyq. Esińizde me, biz tipti sizden usaq-túıek zattar – qyzylsha tuqymdaryn satyp aldyq. Óıtkeni biz ony ózimizden ala almadyq. Aýa raıy burynǵydaı bolǵan joq. Biz tehnıkamyzdy osynda jetkizýdi aıtpaǵanda, tipti ony da saqtap qaldyq. Siz sońǵy bir-eki jylda aıtarlyqtaı baıyp kettińiz. Men sizdiń kóp qurylys salyp jatqanyńyzdy baıqadym. Jaraısyzdar!, - dedi ol.
Prezıdent sonymen qatar Qyrǵyzstannyń burynǵy prezıdenti Qurmanbek Bakıevtiń Belarýstegi ómiri týraly baıandady.
- Bakıev te jaqsy ómir súrip jatyr. Qalypty. Biz ony endi sizge jibermeımiz. Men oǵan: «Endi sapar bolmaıdy, jetkilikti! Belarýste turyńyz», dedim. Keıde men oǵan qonaqqa baramyn. Sondyqtan biz ony sizge jibermeımiz. Biraq ol qatty qınalady jáne elin saǵynyp júr. Ol tym bolmasa, ákesiniń qabirine barǵysy keletinin aıtady. Qyrǵyzdar óz prezıdentiniń ákesiniń qabirine barýyna jol bere almaýy óte ókinishti. Meniń oıymsha, biz bul máseleni qazirgi basshylyqpen sheshemiz, - dedi Lýkashenko.
Eske sala ketsek, 2010 jyldyń sáýirinde Qyrǵyzstan prezıdenti qyzmetinen otstavkaǵa ketý týraly málimdeme jasady.
Q.Bakıevke 2010 jylǵy 7-sáýirde bolǵan oqıǵada qaza tapqan adamdardyń ólimine kináli degen syrttaı aıyp taǵyldy. Osy oraıda Belarýsten saıası baspana alǵan Qurmanbek Bakıev otanyna qaıtyp barmaıtyndyǵyn aıtqan.
Belarýs Respýblıkasynyń prezıdenti Aleksandr Lýkashenko Q.Bakıevti Qyrǵyzstannyń jańa bıligine tapsyrmaıtyndyǵyn málimdegen. Onyń aıtýynsha, ekstradatsııalaýǵa shaqyrý eldiń ýaqytsha úkimeti úshin «nátıjesiz jáne kemsitý».
«Qyrǵyzstannyń prezıdenti Belarýs memleketi men onyń prezıdentiniń qamqorlyǵynda», - dedi A.Lýkashenko.
2023 jyly Bishkekte Qurmanbek Bakıevtiń elge oralýyna qarsy mıtıng ótti.