Ol meniń aǵamdaı, bir-birimizdi árdaıym qoldaımyz - Dımash Qudaıbergen Gennadıı Golovkın týraly
Dımash shara kezinde júrgizýshilerdiń suraǵyna jaýap bere otyryp, boksshy Gennadıı Golovkındi qatty qurmetteıtinin atap ótti.
«Gennadıı Golovkındi «Kanelomen» jekpe-jeginen keıin quttyqtadym. Ol 40-qa kelgenine qaramastan, myqty óner kórsetti jáne kúshti qarsylasymen 12 raýnd bokstasty. Bul sırek kezdesetin qabilet jáne qurmetteýge turarlyq. Gena men úshin árdaıym chempıon. Batyrymyzǵa myqty densaýlyq pen tabys tileımin», - dedi ánshi.
Dımash Gennadıı Golovkınmen jeti jyldan beri tanys ekenin aıtty.
«Ol meniń aǵam sııaqty, biz árdaıym bir-birimizdi qoldaımyz, yntalandyryp, jigerlendirip otyramyz. Gennadıı sııaqty elimizdiń dańqyn shyǵaratyn chempıondarymyz kóp bolsyn», - dedi ol.
Dımash Qudaıbergen GGG jekpe-jeginiń aldynda ánuran oryndaýdy burynnan josparlaǵanyn aıtty. Jospary oryndalyp, 18 qyrkúıekte ánshi Gennadıı Golovkın men Saýl Alvarestiń jekpe-jegi bastalmas buryn Qazaqstannyń ánuranyn oryndap, Las-Vegastaǵy T-Mobile Arena stadıonynda qoshemetke bólendi.
Osy jekpe-jeginen keıin ánshi Gennadıı Golovkınniń qolyn alyp, qoldaý bildirdi. «Biz úshin sen chempıonsyń jáne chempıon bolyp qala beresiń!!! Alǵa Qazaqstan!» - dep jazdy ánshi Instagram jelisindegi resmı paraqshasynda.
Buǵan deıin habarlaǵanymyzdaı, Dımash Qudaıbergen «Stranger» ataýymen ótken aýqymdy jeke kontsertinen keıin Almaty Arena-da fanattarymen kezdesip, kóptegen suraqtarǵa jaýap berdi.
23 qyrkúıek kúni Almatyda alǵash ret Dımash Qudaıbergenniń jeke kontserti anshlagpen ótken bolatyn.
Foto: instagram.com/dimash.news
