Ol meni urǵandy unatady: Astanada erekshe toı kóıleginiń tanystyrylymy ótti

ASTANA. QazAqparat – Astana dúkenderiniń birinde toı kóıleginiń pishinimen keskindelgen erekshe art-nysannyń tanystyrylymy ótti, dep habarlaıdy QazAqparat tilshisi.

«Jańa adamdar» jastar qozǵalysy taǵy bir erekshe bastamamen jurt nazaryn ózderine aýdaryp otyr.

Bul joly olar otbasyndaǵy zorlyq-zombylyq taqyrybyn qozǵap, erekshe art-nysannyń tanystyrylymyn ótkizdi.

Bul sharany olar 15 mamyr - Halyqaralyq otbasy kúnine oraı uıymdastyrǵan.

«Áıelderge jasalatyn zorlyq-zombylyq bizdiń zamannyń eń mańyzdy áleýmettik máselesiniń biri dep esepteımiz. Zorlyq-zombylyq kórsetýshiler ushqary áreketi arqyly jábirlenýshilerdiń quqyǵyn buzyp qana qoımaı, ómirine tutastaı qaýip tóndiredi. Qoǵam bul másele týraly kóbirek aıtyp, kinálilerdi jazalaýdy talap ete bilýi kerek. Áıelderdiń quqyǵyn qurmettep, qorǵamaı jańa jáne ádil Qazaqstan qura almaımyz», - deıdi qozǵalys belsendisi Ǵazıza Ulyqmanova.

Art-nysandaǵy «OL MENІ urǵandy UNATADY» degen jazý alystan kózge shalynady.

Aq tústi toı kóıleginiń ón boıynda qara jazýmen eldegi eń shýly zorlyq-zombylyq faktileri týraly baspasóz málimetteri kórinis tapqan.

Osy arqyly ıdeıa avtorlary zorlyq-zombylyq málimetteri týraly gazet qıyndylarynan tigilgen kóılekti keskindeýge tyrysqan.

Erekshe kóılektiń janynda arnaıy taqta ornatylǵan.

Ol taqtada psıholog-sarapshylardyń turmystyq zorlyq-zombylyq oqıǵalaryn erte bastan anyqtaý, ondaı áreketterge qarsy turý jáne aldyn alý baǵytyndaǵy praktıkalyq aqyl-keńesi jazylmaq.