Ol maǵan deıin qabyldanǵan sheshimder bolatyn – Ǵanı Beısembaev aýdıt qorytyndysyna pikir bildirdi

ASTANA. KAZINFORM – Oqý-aǵartý mınıstri Ǵanı Beısembaev Úkimet otyrysynan keıin ótken baspasóz máslıhatynda Joǵary aýdıtorlyq palata tóraǵasy Álıhan Smaıylovtyń  synyna jaýap berdi.

- Palata tóraǵasy Álıhan Smaıylov sońǵy 5 jylda oqýlyqtardy qaıtalap shyǵarýǵa 16 mlrd teńge negizsiz bólingenin aıtty. Negizsiz bólinýge bilim berý saıasatynyń jıi ózgeretini sebep bolǵan dep otyr. Osy atalǵan 16 mlrd teńgeniń qansha bóligin siz mınıstr retinde bólgizdińiz? - dep surady jýrnalıst.

Mınıstr keleshekte ondaı negizsiz aqsha bólý bolmaıtynyna sendirdi.

- Jyl saıyn balalardyń sany ósýine baılanysty oqýlyqtardy qaıtadan shyǵarý qajettiligi týyndap turady. Ekinshiden, bastapqy kezeńde oqýlyqtardaǵy olqylyqtardyń ornyn toltyrýǵa baılanysty úlken másele kóterilgenin bilesizder. Keıbir oqýlyqtar osyndaı olqylyqtarǵa baılanysty qaıtadan basylǵany belgili. Sońǵy kezde oqýlyq shyǵarýmen baılanysty buıryqtarǵa ózgeris engizildi. Budan bylaı oqýlyqtaǵy qatelikti baspa jibergen bolsa, qaıta basyp shyǵarý shyǵyndary sol baspanyń moınyna júkteledi. Sońǵy jyldary birer baspa qatelik ketken oqýlyqtardy óz esebinen shyǵaryp berdi. Osy qatań talap ári qaraı da baspalarǵa qoıyla beredi, - dedi Ǵanı Beısembaev.

Vedomstvo basshysy aýdıt anyqtaǵan 16 mlrd teńgeniń máselesine ekiushty jaýap berdi.

- Bul jerde kezinde jiberilgen óreskel qatelikterge baılanysty jasalǵan sheshim bolatyn. Ol endi maǵan deıin qabyldanǵan sheshimder. 16 mlrd teńgeniń qanshasy qalaı bólingeni týraly aqparat joq, - dedi mınıstr.

Eske salsaq, Joǵary aýdıtorlyq palata tóraǵasy Álıhan Smaıylov Jibek Joly telearnasyna bergen suhbatynda orta bilim berý saıasatyndaǵy turaqsyzdyq bıýdjetke qandaı salmaq túsirip jatqanyn aıtqan bolatyn.