Ol kún de alys emes - Sadrıddın Ahmedov áıgili boksshylarmen kezdesý jaıly
«Ár boksshynyń bir kýmıri bar. Biraq, boks jolynda meniń naqty kýmırim joq. Sebebi, Golovkın, Kanelo, Taıson nemese Muhamed Álı sekildi áıgili sportshylardyń árqaısysynyń bir jaqsy qabiletin alǵym keledi. Qaıda júrsem de, «Sadrıddın Qazaqstannan eken» dep aıtyp júrse, men úshin - ol úlken qýanysh. Kýmır retinde bireýdi qabyldamaımyn. Ár boksshydan bir qasıetin, mysaly Kanelonyń qorǵanysyn, Golovkınniń qysym kórsetý qabiletin alyp, Maık Taısonnan da boıymyz alasa bolǵasyn bir qarymyn ıgersem deımin. Naqty bir boksshy maǵan unaıdy, sol sekildi judyryqtasamyn dep aıta almaımyn», - dedi Sadrıddın Ahmedov OKQ-da ótken baspasóz máslıhatynda.
Baspasóz máslıhaty aıaqtalǵannan keıin QazAqparat tilshisi boksshynyń jospary týraly surap kórdi.
««Eye of the Tiger Management» promoýterlik kompanııasymen jumys istep jatqanymyzǵa 1 jyl bolady. Kelisimshart bes jylǵa sozylǵan. Qudaı qalasa, úlken jekpe-jekterge meniń, promoýterimniń jáne bapkerimniń kelisýi boıynsha shyǵamyz. Sol sebepti, bári oıda. Bári óz ýaqytymen iske asady», - deıdi Sadrıddın Ahmedov.
Boksshynyń aıtýynsha, promoýterlik kompanııa ataqty boksshylarmen aıqas jaıly usynys bildirmegen.
«Biz árqashan daıynbyz. Belgili bir kezeńnen ótý kerek. Bári óz ýaqytymen. Qaı promoýtermen shyqsam da, qazaq eliniń atynan shyǵatynym anyq. 69,85 kelilik óz salmaǵymda dál qazir myqty sportshylar kóp. Olardyń qataryna Djarrett Herd, Djermell Charlo, Lara sekildi myqty boksshylar bar. Qaı-qaısysymen bolsa da, bir kúni shyǵatynym belgili. Ol kún de uzaq emes. Qudaı qalasa, ol kúnge de jetemiz degen oıdamyn», - dedi boksshy.
Eske sala ketsek, buǵan deıin 24 naýryz kúni «Almaty Arena» kesheninde kásipqoı boks keshi ótetinin jazǵan edik. Oǵan Qazaqstan, Reseı, Afrıka elderi, Venesýela, Ózbekstan, Belarýs, Grýzııa jáne basqa da memleketterdiń boksshylary qatysatyny josparlanǵan.
Almatydaǵy boks keshinde Ahmedov pen 25 jastaǵy Indonezııa ókili Djon Rýba (17-5-1, 9KO) arasynda birinshi orta salmaqtaǵy WBC Asia tıtýly úshin aıqas ótedi. Jekpe-jek 10 raýndqa eseptelgen.