Ol kezde jumys talǵamaıtynbyz: tyl ardageri soǵys kezi týraly
Toqsannan asqan Jazıra Mergenshinova Óskemen qalasynda turady. Surapyl soǵys jyldary onyń jasóspirim shaǵyna tuspa-tus kelgen. QazAqparat tilshisi 1 qazan – Qarttar kúnine oraı ájeıdi áńgimege tartyp, sol bir qıly zaman jaıly estelikterin tyńdap qaıtty.
Jazıra áje Samar aýdany Kókjyra aýylynan Óskemenge 2013 jyly qonys aýdarǵan. Qazir uly men kelininiń qolynda, qos nemeresiniń qyzyǵyn kórip otyr. Soǵys kezindegi qıyn-qystaý kúnderdi esine alsa, aq jaýlyqty apanyń bir kúlip, bir jylap alatyny bar.
«Samar aýdanynda asaý taıynshamen alysyp, ógiz aıdaǵan órimdeı jasóspirimder arasynda bizder de boldyq. Jastar ysqyryp, qıqýǵa basyp, úıretilmegen ógizderdi bir kisideı aıdaıdy. Eń asaýyn aldyǵa jektik, momyndary solardyń izin ala shana súıreıdi. Osylaı júrip, úsh-tórt kún ýaqyt ótedi. Keshke ábden dińkelep úıge jetemiz. Sharshaǵan túrimdi kórgen Nurbátish sheshem: «Shydaı tur qyzym, kóp uzamaı ákeń de soǵystan kelip qalar», - dep jubatyp qoıatyn. Sodan bir jyly bizdiń jaqta bıdaı shyqpaı qalyp, qazirgi Altaı aýdanynyń bir aýylyna jiberdi. Ol jaqta qap-qap bıdaıdy kombaınǵa tasyp, ter tóktik. Jumys qaýyrt edi, kombaın bir sát kidirmeıinshe demalys joq», - deıdi ol.
Mine, osylaı qyzdar 40-50 kelilik qaptardy toqtaýsyz qatarlasa tasyǵan. Qarbalas tirlikten ábden qaljyrap júrgende anasynyń «Ákeń de kelip qalar» degen bir aýyz sózi kúsh beretin. Biraq, saryla kútken Qaısa ákesi soǵystan sol beti oralmady. Bul ýaqytta qara jumysqa ábden mashyqtanǵan qyzdar ashtyqqa birtindep boı úıretken. Azǵantaı kartop kóje men bir kese qara shaıdy kúni boıy talǵajaý etedi.
«Asqazan shurqyrap júredi. Keshkisin as-sý usynsa usynady, joq bolsa jaı tynyǵyp alýǵa tyrysatynbyz. Sóıtip, jyldar syrǵyp ótip jatty. Áıteýir, maıdan shebinen jaqsy jańalyqtar estildi. Nemis basqynshylarynyń shebi qırap, aıbyny qaıta bastapty. Bul 45-shi jyldyń kóktemi edi», - deıdi Jazıra Mergenshinova.
Ájemizdiń aıtýynsha, el-jurt arasynda Keńes áskeriniń kúsh ala bastaǵany jaıly sóz tarady. Dese de, tylda ter tógip júrgenderdiń jumysy kóbeımese azaıǵan joq. Sodan soń kópten kútken Jeńis jalaýy jelbiredi! Halyq bir-birin qushaqtap, máz-meıram bolysty.
«Ekinshi dúnıejúzilik soǵys aıaqtalyp, jer-jerde qalypqa keltirý jumystary bastalǵanda biz de er azamattarmen barlyq derlik tirlikke aralastyq. Aptap ystyqta shómele úıisip, qystyń kózi qyraýda aýyldan birneshe shaqyrym jerdegi selsovetke málimet qaǵazdy jaıaý aparǵanym kóz aldymda. Málimet degende – jumysshylardyń qansha ónim, jún alǵany, qansha shómele úıilgeni jaıly aqparat ǵoı. Ásirese, qysta qaýipti boldy. Tóńirekti torýyldaǵan ash qasqyrlar tap bere me dep záreń qalmaıdy», - deıdi tyl ardageri.
Kolhoz ýaqytynda ol fermada saýynshy bolǵan. Tazalyqqa qatty mán berip, aınalasyn jylan jalaǵandaı etip jınastyratyn.
«Kolhozda jumys istep júrgende jubaıym Bıǵazymen tanysyp, otaý qurdyq. Tatý-tátti ǵumyr keship, tórt ul, tórt qyz súıdik. Olarǵa barymyzdy berip baǵyp-qaqtyq, ósirip jetkizdik. Jarym 2000 jyldardyń basynda qaıtys bolǵan», - deıdi Jazıra Mergenshinova.
Keıýana «Ana dańqy» ordenimen, Uly Jeńiske 50, 55, 60, 65, 70, 75 jyl merekelik medaldarymen marapattalyp, «Altyn alqa» ıegeri atanǵan. Sóz sońynda ol jastarǵa óz aqylyn aıtty.
«Osy beıbit kúnniń qadirin bilip, eńbektiń jalaýyn jyqpańdar. Eńbek etseń bári bolady. Al jalqaýlyq atty dertten jastarymyz aýlaq júrsin deımin! Biz sol zamanda jumys talǵamaıtynbyz. Al qazir oqý oqyp, qalaǵan salańa barýǵa bolady ǵoı. Sol úshin búgingi urpaq baqytty!» - deıdi áje.
