Olga Terenova: Muǵalim - bala armanyn oryndaýǵa kómektesetin basty tulǵa
- Olga Vıktorqyzy, ózińiz týraly aıtyp berseńiz ?
- Meniń Qazaqstanǵa qonys aýdarǵanyma bıyl 48 jyl toldy. Sonaý 1973 jyly, Almatyǵa joldamamen kelgen edim. Men Reseıdiń Lebedıan qalasyndaǵy pedagogıkalyq ýchılışede oqydym. Bizge joldama bergen fızıka pániniń muǵalimi: «Sizder halqy meıirimdi ári qonaqjaı elge attanyp barasyzdar. Ol jaq unaıtyn bolady» degen rasynda aıtqany keldi, keń baıtaq Qazaqstan bizdi baýrap aldy!
Almatyǵa kelgen kúnim áli esimde. Poezd «Almaty-2» vokzalyna kelip toqtap, esikteri ashylǵanda Іle Alataýynyń qarly shyńyn kórdim. Sondaı keremet kórinis. Uzaq ýaqyt boıy kóz almaı qarap turdym. Men Ońtústik Sahalınsk qalasynda dúnıege keldim. Kýrıl araldarynda, Tynyq muhıtynda, Baıkalda boldym, biraq qarly shyńdy kórýim birinshi ret. Alǵashqy jarqyn áser áli kúnge deıin umytylǵan joq.
Meniń úlken otbasym Reseıde qaldy. Men ata – anamdy, aǵalarym men ápkelerimdi qatty saǵynatynmyn. Ol kezde nebári 17 jasta edim, biraq elime qaıtam degen oı bolǵan joq. Meniń eńbek jolym osylaı bastaldy.
Joǵary bilimdi osynda, qazirgi Abaı atyndaǵy Qazaq ulttyq pedagogıkalyq ýnıversıtetinde aldym. Eńbek jolymdy Almaty oblysy Qarasaı aýdanyna qarasty shaǵyn aýyldyq mektepten bastadym. Búgingi kúni Almaty qalasyndaǵy №79 gımnazııada orys tili men ádebıeti pániniń muǵalimi bolyp jumys isteımin.
Eńbegim elenip, keıin «Halyqaralyq bilim kóshbasshysy», Mıhaıl Sholohov atyndaǵy medalimen marapattaldym.
- Qazirgi qoǵamda muǵalimniń róli qandaı ?
- Ustazdyń qoǵamdaǵy orny erekshe. Muǵalim-balanyń jeke tulǵasyn qalyptastyrýshy, mańyzdy tálim-tárbıe ónegesiniń bastaýshysy, jarqyn úlgisi, bala qııalyn samǵatyp, armanyn oryndaýǵa kómektesetin basty tulǵa. Men muǵalim bolýdy kishkentaı kezimnen armandadym. Bes jasymda Ekinshi dúnıejúzilik soǵysqa qatysqan atam Tıhonǵa sabaq berip « mektep oınaýdy» jaqsy kóretinmin. Pedagog mamandyǵyn tańdaýǵa degen yqylas sol kezde paıda boldy. Men mamandyq tańdaýda qatelespedim.
- Sizdiń oıyńyzsha, muǵalim qandaı erekshe qasıetterge ıe bolýy kerek ?
- HHІ ǵasyr - aqparattyq tehnologııalar men tsıfrlandyrýdyń damyǵan kezi. Qazirgi ýaqytta muǵalim kerek pe degen oılar jıi aıtylyp júr. Bul durys emes. Muǵalim mamandyǵyna degen suranys qashanda joǵary.
Muǵalim - jany taza, júregi meıirimge toly adam. Kez- kelgen adam ustaz bola almaıdy. Bul únemi izdenis pen tózimdilikti qajet etetin mamandyq. Oqýshylar árqashan muǵalimniń qaıyrymdylyǵyn, jaýapkershiligin, ádildigin baǵalaıdy. Adamgershilik bárinen joǵary turady.
Meniń basty maqsatym- oqýshylaryma tolyqqandy bilim berý jáne adamgershilikke tárbıeleý. Árqashan alǵa umtylýǵa úıretý. Meniń oqýshylarym ádebıetti túsiný - jalpy adamzat qundylyqtary álemine saıahattaý ekenin biledi. Sondyqtan oqýshylaryma álem klassıkteriniń shyǵarmalaryn oqýǵa jıi keńes beremin.
Shákirtterime A. Sent-Ekzıýperıdiń «Adam bolý-óz jaýapkershiligińdi seziný» degen sózin jıi eske salamyn. Biz balalarmen osyndaı bolýǵa tyrysamyz.
- Oqýshylaryńyz týraly aıtyp berińizshi ?
- Men ondaǵan shákirt tárbıeledim. Alǵashqy shákirtterim shetel asyp ketti. Olarmen «Odnoklassnıkı» chatynda sóılesip turamyn. Olar Almanııada, Reseıde turady. Árkim súıikti isimen aınalysady, otbasy bar. Mekteptegi qyzyqty kúnderdi esterine jıi alady.
Bir sózben aıtqanda, shákirtterimmen maqtanamyn. Olardyń boıyndaǵy adamgershilik qasıetterin baıqadym. Bul- ustaz úshin úlken baqyt. Árqaısysy óz joldaryn taýyp, baqytty ǵumyr keship jatyr.
Qazirgi oqýshylarym da osal emes. Túrli halyqaralyq, respýblıkalyq olımpıadalardan júldeli oryn alyp júr. Bilimge degen qushtarlyǵy zor.
- Áriptesterińizge qandaı tilek aıqyńyz keledi ?
- Men barsha qazaqstandyq áriptesterimdi kásibı merekemizben quttyqtaımyn! Jańa shyǵarmashylyq ıdeıalar, qýanyshty jeńister men shabyt, kóptegen jarqyn jáne baqytty kúnder tileımin.
- Áńgimeńizge raqmet!