Olga Shıshıgına Ulttyq mýzeıge jeke zattaryn tartý etti
NUR-SULTAN. QazAqparat - Qazaqstandyq jeńilatletshi, Olımpıada chempıony Olga Shıshıgına sporttyq jeke zattaryn elordadaǵy Ulttyq mýzeıge tartý etti, dep habarlaıdy QazAqparat tilshisi.
Olga Shıshıgınanyń syıǵa tartqan jeke zattary QR Ulttyq mýzeıiniń «Asyl mura» zalynan oryn aldy. Olardyń qatarynda tanymal sportshynyń 2000 jyly Sıdneı jazǵy olımpıadasynan estelik zattary, sondaı-aq basqa da halyqaralyq sporttyq jarystarda jeńip alǵan medaldar men nagradalary bar.
«Sporttaǵy jetistikterimniń bir bóligin mýzeıge tapsyratyn kez keldi dep oılaımyn. Medaldar men marapattar úıde ǵana saqtalyp turmaı, mýzeıde saqtalǵany jón shyǵar. Sebebi meniń jetistikterim - ol elimniń jetistigi. Osy oraıda endigi ýaqytta mýzeıge kelýshiler meniń sporttaǵy jeńip alǵan marapattarymdy óz kózderimen kóre alady. Bul zattar meniń ómirimniń bir bóligi desemde bolady. Munda Keńes Odaǵy zamanynan kúni keshege deıingi men qatysqan jarystardan estelikter bar», - dedi Olga Shıshıgına.
Olımpıada chempıony Ulttyq mýzeıge barlyǵy 45 jeke zatyn syıǵa tartty.
«Olga Shıshıgına biz úshin sporttaǵy jarqyn jeńistiń sımvoly. Jerlesimizdiń Sıdneı Olımpıadasyndaǵy jeńisi áli kúnge esimizde jáne ol sport tarıhynda máńgi qalady. Bul kisi otanymyzdyń patrıoty jáne sportpen qatar elimizdiń damýyna da óz úlesin qosyp keledi», - deıdi QR Ulttyq mýzeıiniń dırektory Arystanbek Muhamedıuly.
Aıta ketsek, atalǵan is-shara «Ulttyq mýzeıge syıǵa tartý» jobasy aıasynda uıymdastyryldy. Ondaǵy maqsat- elimizge jáne álemge tanymal tulǵalarǵa tıesili qundy jáne estelik zattardy saqtap, ony keıingi urpaqqa jetkizý.
