Olga Shıshıgına Olımpıada chempıondaryna syıaqyny bólip tóleýdi usyndy

Aıta ketken jón, jaqynda Májilis depýtattary dopıng úshin sportshylardyń jaýapkershiligin kúsheıtýge arnalǵan zań jobasyn birinshi oqylymda maquldady. Oǵan sáıkes, dopıng qoldanǵandar aqshalaı syıaqyny qaıtarýǵa mindetteldi. Budan bólek, sportshylar, bapkerler men komanda jetekshileriniń aı saıynǵy tólemderi toqtatylady. Tipti, halyqaralyq jarystarda jaraqat alǵany úshin beriletin járdemaqydan da aıyrý josparlanǵan. Al syıǵa berilgen páterlerdi bastapqyda tek jalǵa alýǵa ǵana múmkindik bolady. 10 jyldyń ishinde WADA dopıng anyqtamasa, ol baspanany jekemenshikke aýdarýǵa bolady.

«Endi, biz páter máselesin rettedik. Baspana aldymen jalǵa beriledi, artynan jekemenshikke aýdarýǵa múmkindik bar. Al aqshalaı syıaqy qalaı qaıtarylady? Negizgi másele - osy. Syıaqyny tolyǵymen qaıtarý qıyn ǵoı. Menińshe, aqshalaı syıaqyny birden bermeı, bólip tóleýge bolady. Áıtpese, qyrýar qarjyny berip, artynan ony qaıtarýdy talap etsek, sportshyǵa úlken salmaq túsedi. Ony barlyq tıtýldaryn alyp qoıady, páterinen shyǵaryp tastaıdy. Onyń ústine aqshalaı syıaqyny qaıtarý qajet. Bul - úlken materıaldyq ári psıhologııalyq aýyrtpalyq», - dedi O.Shıshıgına QazAqparat tilshisine bergen suhbatynda.

«Máselen, qazir bizde «sporttyq zeınetaqy» degen tólem bar. Mysaly, men ózim Olımpıada altyny úshin aı saıyn 24 aılyq eseptik kórsetkish (1AEK - 2 525 tenge) kóleminde sporttyq zeınetaqy alyp turamyn. Biraq ony alý úshin 20 jyldyq eńbek ótiliń de bolýy shart. Meniń oıymsha, sportshy Olımpıada chempıony atandy ma, kelesi aıdan bastap aqshalaı syıaqyny bólip, sporttyq zeınetaqy sııaqty berip otyrýǵa bolady», - dep atap kórsetti O.Shıshıgına.

Depýtattyń sózine qaraǵanda, qazirgi kezde birinshi oqylymnan ótken zań jobasyna qosymsha usynystar daıarlanyp jatyr. Sonyń bárin ekinshi oqylymda engizý josparlanǵan.