Olga Rypakovanyń jubaıy ShQO Dene shynyqtyrý basqarmasynyń basshysy boldy
Basqarma ujymyna jańa basshyny tanystyrǵan oblys ákimi Danıal Ahmetov Denıs Rypakovtyń tájirıbesi mol maman ekenin aıta kele, bul taǵaıyndaý óńir sportynyń damýyna tyń serpin beretinine senim bildirdi.
«Bul azamatty barlyǵyńyz da jaqsy bilesizder. Denıs Rypakov - tanymal sportshy ǵana emes, sondaı-aq osy salada túrli basshylyq qyzmet atqarǵan bilikti maman, tájirıbeli basshy. Máselen, ol búginde Óskemendegi Olga Rypakova atyndaǵy jeńil atletıka ortalyǵyn basqaryp, óńir sporty úshin ǵana emes, respýblıkalyq mańyzǵa ıe jumystardyń basy-qasynda júr. Denıs Rypakov respýblıkalyq Jeńil atletıka federatsııasymen de tyǵyz baılanysta. Ol - elimizdegi atalmysh sport túriniń betkeustar mamandarynyń biri. Sondyqtan Denısti osyndaı basshylyq qyzmetke taǵaıyndaý óte oryndy sheshim dep bilemin. Jańa basshy senim údesinen shyǵatynyna kúmánim joq», - dedi aımaq basshysy.
Aıta keteıik, ShQO-nyń Dene shynyqtyrý jáne sport basqarmasyn buǵan deıin Asqar Mojanov basqaryp keldi.
Denıs Sergeevıch Rypakov 1980 jyly 20 tamyzda Almaty qalasynda dúnıege kelgen. Mamandyǵy boıynsha - dene shynyqtyrý muǵalimi. 2001 jyly Qazaq memlekettik dene shynyqtyrý jáne sport akademııasynyń Dene shynyqtyrý ınstıtýtyn aıaqtaǵan. Qazaqstan Respýblıkasynyń eńbek sińirgen jattyqtyrýshysy jáne QR sport sheberi. Eńbek jolyn 2001 jyly elordada «Shtattyq ulttyq komandalar jáne sporttyq rezerv dırektsııasynda» nusqaýshy retinde bastaǵan. Keıin Ulttyq qaýipsizdik komıtetiniń Áskerı ınstıtýtynda - maman, «Shtattyq ulttyq komandalar jáne sporttyq rezerv dırektsııasynda» - bapker bolyp eńbek etti.
2013 jyldan bastap «ShQO Jeńil atletıkadan mamandandyrylǵan balalar-jasóspirimder olımpıadalyq rezerv sport mektebin» basqardy.
Onyń sportshy retinde de jetken jetistikteri az emes. Máselen, ol 2003 jyly Ońtústik Koreıanyń Tegý qalasynda ótken Dúnıejúzilik ýnıversıadada 400 metrge júgirý saıysynda kúmis júldege ıe boldy.
Denıs Rypakov Olımpıada chempıony Olga Rypakovanyń jubaıy, eki bala tárbıeleýde.
