Olga Rypakovany óskemendikter qoshemetpen qarsy aldy
ASTANA. QazAqparat - Jeńil atletıkadan Olımpıada chempıony Olga Rypakova sońǵy 10 kúnde eki birdeı jarysta el mereıin asyryp, týǵan jeri Óskemen qalasyna oraldy, dep habarlaıdy QazAqparat tilshisi.
QR Jeńil atletıka federatsııasy málim etkendeı, ol 30 tamyzda Jakartada ótken jazǵy Azııa oıyndarynda top jardy. Odan keıin Chehııanyń Ostrava qalasynda Qurlyqaralyq kýboktyń kúmis júldesin enshiledi.
Sportshy keshe óziniń týǵan qalasy Óskemenge oraldy. Ony áýejaıda óńir basshylary men qarapaıym jankúıerler kútip aldy.
Sportshyny ShQO dene shynyqtyrý jáne sport basqarmasynyń basshysy Asqar Mojanov quttyqtap, oǵan gúl shoqtaryn tabys etti.
- Azııa oıyndarynda osymen tórtinshi márte baq synadym. Jeńip alǵan júldemniń el qorjynynyń tolyǵýyna sebepker bolǵanyna qýanyshtymyn. Alǵa qoıǵan maqsatym da osy edi, endeshe maqsatyma jete aldym. Konstıtýtsııa kúninde jarys jolyna shyǵyp, meıramǵa oraı jaqsy syılyq tartý ettim dep oılaımyn. Aımaq basshysy Danıal Ahmetovke jeńil atletıkanyń damýyna úlken qoldaý kórsetip kele jatqanyna alǵys bildiremin, - dedi Olga Rypakova.
Aldaǵy kúnderi úsh qarǵyp sekirý sheberi jaqyndarynyń janynda bolyp, sál tynyǵyp almaq.
Esterińizge sala keteıik, «Altay athletics» kásibı jeńil atletıka klýbynyń kapıtany Olga Rypakova Azııa oıyndarynda altyn medal oljalap, Qurlyqtyq básekede kúmis júlde ıelengen bolatyn. Bir qyzyǵy, shyǵysqazaqstandyq sportshy eki saıysta da 14,26 metrge sekirgen.
