Olga Rypakova: Sporttyq mansabymdy aıaqtaǵan joqpyn

ÓSKEMEN. QazAqparat - Qazaqstandyq jeńil atlet, úsh dúrkin Olımpıada júldegeri Olga Rypakova sporttyq mansabyn aıaqtamaıtynyn aıtty, dep habarlaıdy QazAqparat tilshisi.

Osyǵan deıin Olga Rypakovanyń sporttyq mansabyn aıaqtaǵandyǵy týraly habar buqaralyq aqparat quraldarynda taraǵan bolatyn. Alaıda jeńil atlet bunyń shyndyqqa janaspaıtynyn málimdedi.

«Áleýmettik jelidegi birde-bir jazbamda mansabymdy aıaqtaıtyndyǵym týraly sóz joq. Sondyqtan jýrnalıster men blogerlerdi jalǵan aqparat taratpaýǵa shaqyramyn. Sportshyǵa aýqymdy dodadan keıin demalys kerek. Jeńis pen jeńilisten keıin kelesi synǵa daıyndalý qajet. Men de áli jattyǵyp, túrli básekelerde óner kórsetkim keledi», - dep jazdy ol Instagram jelisindegi jeke paraqshasynda.

Aıta keteıik, Tokıo Olımpıadasynda úsh qarǵyp sekirýde Olga Rypakova fınalǵa óte almaǵan bolatyn.