Olga Rypakova sportpen qosh aıtysty
NUR-SULTAN. QazAqparat – Qazaqstandyq jeńil atlet Olga Rypakova kásibı sportpen qoshtasatyny týraly málimdedi, dep habarlaıdy QazAqparat.
«Meniń sporttaǵy mansabym Olga Saladýhına jáne Katıa Mena sekildi keremet sportshy qyzdardyń osy sektorda óner kórsetýimen týra kelgenine baqyttymyn. Tokıo Olımpıadasy men úshin de, olar úshin de sporttaǵy mansabymnyń qorytyndysy boldy. Olar men úshin úzdik úshtik bolyp qala beredi. Endigi ýaqytta men olardy qarsylas retinde emes jaqyn qurbym retinde qurmettep, jaqsy kóremin. Aldaǵy ýaqytta sektordan tys talaı kezdesemiz dep oılaımyn. Olarǵa tabys tilep, alǵa qoıǵan arman-maqsattarynyń oryndalýyna tilekshimin. Ómirleri tabysqa toly bolsyn!. Eshqashan jasymasyn!», - dep jazdy O. Rypakova Instagram paraqshasynda.
Aıta keteıik, Tokıo Olımpıadasynda úsh qarǵyp sekirýde qazaqstandyq Olga Rypakova fınalǵa óte almady.
Sportshy buǵan deıingi úsh Olımpıadada da júldegerler qatarynan kórindi. 2008 jyly kúmis, 2012 jyly altyn, 2016 jyly qola júldeger atandy.
