Olga Rypakova Rabattaǵy «Gaýhar lıgany» tórtinshi orynmen aıaqtady
ASTANA. QazAqparat - Olımpıada chempıony Olga Rypakova jeńil atletıkadan Marokko astanasy Rabatta ótken «Gaýhar lıga» saıysynyń 10-kezeńine qatysyp, jarysty tórtinshi orynmen aıaqtady, dep habarlaıdy kazathletics.kz.
Rabatqa Rıo Olımpıadasynyń kúmis júldegeri, Rımde ótken «Gaýhar lıganyń» tórtinshi kezeńniń jeńimpazy Venesýela eliniń atleti ıÝlımar Rohas kelgen joq. Esesine ózge myqtylardyń bári qatysty. Olardyń arasynda Rıo Olımpıadasynyń chempıony kolýmbııalyq Katrın Ibargýen de bar.
Rabatta úsh qarǵyp sekirýshi qyzdar Rımdegideı joǵary nátıje kórsete almady. Jeńimpaz Katrın Ibargýenniń úzdik kórsetkishi - 14,51 sm. Kúmis júldege ıamaıkalyq Kımberlı Ýılıams (14,31 sm) qol jetkizdi. Úshinshi orynǵa Grekııadan kelgen Paraskevı Papahrıstý (14,21 sm) ıe boldy. Ókinishtisi, Olga grek qyzynan bar-joǵy 1 santımetrge qalyp qoıdy. Jerlesimizdiń nátıjesi - 14,20 sm. Sóıtip, tórtinshi orynǵa turaqtady.
Jarys aldynda Olga Rypakovanyń jeke bapkeri ári jubaıy Denıs Rypakov qazaqstandyq sportshydan asa joǵary nátıje kútýdiń qajeti joq ekenin, ázirge álem chempıonatyna daıyndyq ekenin aıtqan bolatyn.
Endi Olımpıada chempıony 21 shilde kúni Monakodaǵy on birinshi kezeńge qatysady. Odan keıin jerlesimiz Londondaǵy álem chempıonatynda óner kórsetedi.
Dohada bastalǵan lıga Belgııa astanasy Brıýsellde aıaqtalady. Jalpy «Gaýhar lıga» 14 kezeńnen turady. Chempıon atanǵan atletti 50 myń AQSh dollary kóleminde syıaqy kútip tur. Sondaı-aq árbir kezeńde úzdik nátıje kórsetken sportshynyń qaltasy da bos qalmaıdy. Kezeń jeńimpazdaryna 10 myń dollar kóleminde syıaqy úlestiriledi.
