Olga Rypakova: Otbasyma kóbirek kóńil bólgim keledi

NUR-SULTAN. QazAqparat – London - 2012 Olımpıadasynyń chempıony, Beıjiń-2008 jáne Rıo-2016 Olımpıada oıyndarynyń júldegeri Olga Rypakova aldaǵy josparlary týraly suraqtarǵa jaýap berdi, dep habarlaıdy QazAqparat tilshisi.

«Eger sizge jeńil atletıka federatsııasyna basshylyq laýazym usynylsa, sol jerge barasyz ba nemese ózińizge jáne otbasyńyzǵa kóbirek kóńil bólesiz be?» - dep surady tilshiler.

Jeńil atlet ózi úshin árdaıym otbasy birinshi orynda ekenin aıtty.

«Olar meni sportta da qoldaǵan edi. Árıne, bul óte qıyn. Kóptegen adamdar sport úshin qandaı qurbandyqtar jasaısyz dep suraıdy. Bul meniń otbasym, balalarym. Árıne, jaqyn arada balalaryma jáne otbasyma kóbirek kóńil bólgim keledi. Otbasy birinshi orynda, qalǵanyn kóre jatarmyz», - dedi O. Rypakova Ortalyq kommýknıkatsııalar qyzmetinde.

Ol sportpen baılanysty barlyq máselelerdi ákesimen talqylaıtynyn atap ótti.

«Ákem – bala kezimnen meniń jattyqtyrýshym. Meni jáne sportty baılanystyratyn barlyq máseleler, bolashaqqa josparlar birlesip talqylanady. Aldaǵy jospardy áli talqylamadyq. Erteń de emes, múmkin kelesi aptada aldaǵy josparlardy, bolashaq ómirdi talqylaıtyn shyǵarmyz. Meniń oıymsha, bul tez sheshilýi tıis másele emes. Barlyǵyn, qalaı ómir súrý kerek, kelesi jarystarǵa jattyǵý kerek pe, Azııa oıyndaryna daıyndalý kerek pe – naqtylaıtyn ýaqyt bar. Azııa oıyndaryna deıin sportta qalý týraly da usynystar boldy», - deıdi O. Rypakova.

Buǵan deıin sportshy aldaǵy ómiri men jumysynyń sportpen tyǵyz baılanysty bolatynyn aıtqan edi.

Aıta keteıik, búgin Tokıo Olımpıadasynda úsh qarǵyp sekirýde qazaqstandyq Olga Rypakova fınalǵa óte almady.

Sportshy buǵan deıingi úsh Olımpıadada da júldegerler qatarynan kórindi. 2008 jyly kúmis, 2012 jyly altyn, 2016 jyly qola júldeger atandy.

Olga Rypakova baspasóz máslıhatyn ótkizip, jankúıerlerine alǵys aıtty.