Olga Rypakova men Vıktorııa Zıabkına IAAF qurlyqaralyq kýbogyna qatysady
ASTANA. QazAqparat - Olga Rypakova men Vıktorııa Zıabkına 8-9 qyrkúıekte Chehııanyń Ostrava qalasynda ótetin Halyqaralyq jeńil atletıka federatsııalary qaýymdastyǵynyń (IAAF) qurlyqaralyq kýbogyna qatysady, dep habarlaıdy QazAqparat tilshisi.
QR Jeńil atletıka federatsııasy málim etkendeı, bul jarys osymen úshinshi ret uıymdastyrylǵaly otyr. Oǵan tórt qurlyqtyń, ıaǵnı Eýropa, Amerıka, Afrıka jáne Azııa-Muhıt araldary elderiniń quramalary qatysady.
Qurlyqaralyq kýboktyń baǵdarlamasynda 37 saıys túri engizilgen (18-i erler arasynda, 18-i áıelder arasynda jáne 4h400 metrlik aralas estafeta). Árbir saıys boıynsha sportshylarǵa upaı úlestiriledi. Sol boıynsha úzdik qurlyqtyq komanda anyqtalady. Bir saıys túrinen árbir qurlyqtan 2 sportshy ǵana qatysa alady.
Shilde aıynyń basynda Bangkokta Azııa jeńil atletıka qaýymdastyǵynyń keńesi ótti. Onda Muhıt elderimen birlesip jasaqtalatyn qurama sóz boldy. Keńestiń sheshimi boıynsha qurama sportshylardyń bıylǵy maýsymdaǵy kórsetkishterine baılanysty jasaqtalady. Ázirge qurlyqtyq dodaǵa qatysatyn atletterdiń alǵashqy tizimi usynyldy. Naqty quram Indonezııadaǵy Azııa oıyndarynan keıin belgili bolady.
Aldyn ala usynylǵan tizimge bizdiń elden eki sportshy kirip otyr. Úsh qarǵyp sekirýden Azııa qurlyǵyndaǵy eń úzdik nátıjeniń ıesi Olga Rypakova (14,25 m) men 200 metrge júgirýdiń kóshbasshysy Vıktorııa Zıabkına (22.73 s) bar. Eki sportshyǵa qurlyqaralyq kýbokta Azııa jáne Muhıt elderi quramasynyń namysyn qorǵaýǵa usynys tústi. Jerlestermiz óz kelisimderin berdi. Sondaı-aq Zıabkınaǵa 100 metrge júgirýden de qatysýǵa múmkindik bar.
Aıta keteıik, IAAF-tyń qurlyqaralyq kýbogy eń alǵash ret 2010 jyly Splıtte ótkizilgen. Horvatııada Qazaqstan atynan qatysqan Olga Rypakova 15.25 metrge sekirip, Azııanyń rekordyn jańartqan.Sondaı-aq óziniń sporttyq karerasyndaǵy úzdik nátıjeni tirkegen bolatyn.
