Olga Rypakova qurlyqaralyq kýbokta júldeger atandy
ASTANA. QazAqparat - Búgin Chehııanyń Ostrava qalasynda alaýy tutanǵan Halyqaralyq jeńil atletıka federatsııalary qaýymdastyǵynyń (IAAF) qurlyqaralyq kýbogynda qazaqstandyq Olga Rypakova kúmis medal jeńip aldy, dep habarlaıdy QazAqparat tilshisi.
QR Jeńil atletıka federatsııasy habarlaǵandaı, Azııa qurlyǵynan qatysqan qazaqstandyq sportshy Olga Rypakova úsh qarǵyp sekirýden kúmis júldege ıe boldy.
Jalpy bul jarysqa tórt qurlyqtyń quramalary qatysyp jatyr: Eýropa, Amerıka, Afrıka jáne Azııa-Muhıt araldary elderi. Qurlyqaralyq kýboktyń baǵdarlamasynda 37 saıys túri engizilgen (18-i erler arasynda, 18-i áıelder arasynda jáne 4h400 metrlik aralas estafeta).
Árbir saıys boıynsha sportshylarǵa upaı úlestiriledi. Sol boıynsha úzdik qurlyqtyq komanda anyqtalady. Bir saıys túrinen árbir qurlyqtan 2 sportshy qatysady. Jarys eki kúnge jalǵasady. Búgin, 8 qyrkúıek kúni qazaqstandyq Olga Rypakova jarys jolyna shyǵyp, ekinshi orynǵa ıe boldy.
33 jastaǵy otandasymyz 14.26 metrge sekirdi. Osydan 9 kún buryn Rypakova Jakartadaǵy Azııa oıyndarynda da 14.26 metrdi baǵyndyrǵan.
Úsh qarǵyp sekirýden qurlyqaralyq kýboktyń altyny Amerıkanyń atynan qatysqan Olımpıada chempıony kolýmbııalyq Katrın Ibargýenge buıyrdy.Ol Chexııada 14,76 metrge sekirdi. Qola júldeni Eýropa namysyn qorǵaǵan grekııalyq Paraskevı Papahrıstý enshiledi - 14,22.
Aıta keteıik, IAAF-tyń qurlyqaralyq kýbogy eń alǵash ret 2010 jyly Splıtte ótkizilgen. Horvatııada Qazaqstan atynan qatysqan Olga Rypakova 15.25 metrge sekirip, Azııanyń rekordyn jańartqan. Sondaı-aq, óziniń sporttyq karerasyndaǵy úzdik nátıjeni tirkegen bolatyn.
