Olga Rypakova qurlyqaralyq kýbok jarystaryna qatysady
ASTANA. QazAqparat - Qazaqstan jeńil atletterin endi Halyqaralyq jeńil atletıka federatsııalary qaýymdastyǵynyń (IAAF) qurlyqaralyq kýbogy kútip tur, dep habarlaıdy QazAqparat tilshisi.
QR Jeńil atletıka federatsııasynyń habarlaýynsha, úsh qarǵyp sekirýden jazǵy Azııa oıyndarynyń chempıony atanǵan Olga Rypakova endi 8-9 qyrkúıekte Chehııanyń Ostrava qalasynda ótetin Halyqaralyq jeńil atletıka federatsııalary qaýymdastyǵynyń (IAAF) qurlyqaralyq kýbogyna qatysady.
Oǵan tórt qurlyqtyń quramalary qatysady: Eýropa, Amerıka, Afrıka jáne Azııa-Muhıt araldary elderi. Qurlyqaralyq kýboktyń baǵdarlamasynda 37 saıys túri engizilgen (18-i erler arasynda, 18-i áıelder arasynda jáne 4h400 metrlik aralas estafeta). Árbir saıys boıynsha sportshylarǵa upaı úlestiriledi. Sol boıynsha úzdik qurlyqtyq komanda anyqtalady. Bir saıys túrinen árbir qurlyqtan 2 sportshy ǵana qatysa alady.
Shilde aıynyń basynda Bangkokta Azııa jeńil atletıka qaýymdastyǵynyń Keńesi ótti. Keńestiń sheshimi boıynsha qurama sportshylardyń bıylǵy maýsymdaǵy kórsetkishterine baılanysty irikteledi.
Jakartada 14.26 metrge sekirgen Olga Rypakova osy jarysqa endi Almatyda daıyndalady. Sondaı-aq, Qazaqstannan Vıktorııa Zıabkına da bar. Ol 200 metrge júgirýden baq synaıdy.
Aıta keteıik, IAAF-tyń qurlyqaralyq kýbogy eń alǵash ret 2010 jyly Splıtte ótkizilgen. Horvatııada Qazaqstan atynan qatysqan Olga Rypakova 15.25 metrge sekirip, Azııanyń rekordyn jańartqan. Sonymen birge, óziniń sporttyq karerasyndaǵy úzdik nátıjeni tirkegen bolatyn.
