Olga Rypakova «Gaýhar lıgasynyń» fınalyna qatysýdan bas tartty
NUR-SULTAN. QazAqparat - Jeńil atletıkadan Qazaqstan komandasynyń úzdigi, úsh qarǵyp sekirýden Olımpıada chempıony Olga Rypakova «Gaýhar lıgasyna» qatysýdan bas tartty. Bul týraly ol Instagram-daǵy paraqshasynda jazdy, dep habarlaıdy QazAqparat.
Ol Álem chempıonatyna daıyndyqty barynsha kúsheıtý úshin osyndaı qadamǵa barǵan.
«Sizderdiń pikirlerińizdi oqyǵan saıyn, sportshyǵa jankúıerdiń qoldaýy qanshalyqty mańyzdy ekenin túsinemin. Parıjde sátsiz óner kórsettim - 14,16 metr. «Gaýhar lıgasynyń» fınaldyq kezeńine ótsem de, fınalǵa qatysýdan bas tarttym. Sebebi, Álem chempıonatyna daıyndyqqa kóbirek kóńil bólgim keledi. Parıjdegi kórsetkishke keler bolsam... Sportshylar meni túsinedi: udaıy jańa bıikti baǵyndyrǵyń keledi. Tipti, bul óz densaýlyǵyńa zııan bolsa da. Belokýrıhada em alǵan soń, birden Parıjdegi jarysqa kettim. Áli tolyq emdelip úlgermegenim sekirý barysynda baıqaldy. Dese de, munyń úlken tájirıbe bolǵanyn moıyndaımyn. Barlyqtaryńyzǵa jyly sózderińiz ben qoldaýlaryńyz úshin alǵys aıtamyn. Alda Álem chempıonaty men Tokıodaǵy Olımpıada oıyndary kele jatyr. Sol syndarda biz mindetti túrde jaqsy nátıje kórsetemiz. Bastysy – eńseni bıik ustap, daıyndyqty jalǵastyrý», - dep jazdy Rypakova.
Sportshy Parıjdegi áıgili «Gaýhar lıgasy» týrnıriniń fınalyna ótkenin buǵan deıin jazǵan bolatynbyz.
