Olga Rypakova el azamattyǵyn alǵan kenııalyq sportshylarǵa qatysty pikir bildirdi
ASTANA. QazAqparat - Olımpıada chempıony Olga Rypakova kenııalyq jeńil atletterdiń ulttyq quramaǵa qabyldanýy týraly oıymen bólisti, dep habarlaıdy olympic.kz.
Tanymal sportshy óz pikirin áleýmettik jelide jarııalaǵan.
Rypakova óz sózinde sheteldik sportshylardyń otandyq jeńil atletıkanyń damýyna úles qosatynyn atap ótken.
Aıta ketelik, Nora Djerýto, Karolın Kıpkırýı, Deızı Djepkımeı, Shedraka Koecha syndy sportshylar bapkeri ári menedjeri Kennet Rotıchpen birge 2018 jyly Qazaqstan tólqujatyn alǵan edi.
«2018 jyldyń jeltoqsanynda kenııalyq tórt sportshy men olardyń bapkeri Qazaqstan azamattyǵyn qabyldady. 2019 jyldyń qańtarynan bastap atalǵan sportshylar Shyǵys Qazaqstan oblysynyń quramasy men «Altaı Atletıks» klýbynyń namysyn qorǵaıdy.
Elimizdegi jeńil atletıkanyń damýyna beı-jaı qaramaıtyndyqtan, kenııalyq sportshylardyń kelýi oń áser beretinin aıtqym keledi.
Bul álemde bar tájirıbe. Qazaqstan úshin de tańsyq emes. Elimizge 2005 jyldan beri sheteldik sportshylar shaqyrylýda.
Qazaqstan týynyń astynda óner kórsetetin Kenııa sportshylary álemdik jarystarda júldege iligip júr. Osylaısha, biz álemdik jeńil atletıkada aıtarlyqtaı ımıdj qalyptastyramyz.
Kenııalyq jelaıaqtar óz tájirıbeleri men tehnıkasyn bizdiń sportshylarǵa úıretip, jastarǵa jol kórsetinine, sheberlik sabaqtaryn ótkizerine senimim mol. Odan bólek, sportshylar ishki birinshiliktegi básekelestikti arttyra túsedi.
Sportshylar óz erikterimen QR azamattyǵyn qabyldady. Jaqsy nátıje kórsetýge talpynǵan adam retinde mundaı áriptesterim baryna qýanamyn», - deıdi Rypakova.
