Olga Býlavkına: Parlament qabyldaǵan zańdar reformalardyń iske asýyna yqpal etti

ÓSKEMEN. QazAqparat – QR Parlamenti Senatynyń depýtaty Olga Býlavkına «Táýelsiz Qazaqstan: Jasampazdyqqa toly jyldar. Shyǵys Qazaqstan oblysynyń basty jetistikteri» atty dóńgelek ústel barysynda Parlament qabyldaǵan zańdar eldegi mańyzdy reformalardyń iske asýyna yqpal etkendigin aıtty, dep habarlaıdy QazAqparat tilshisi.

«Bıyl elimizdiń Táýelsizdik alǵanyna 30 jyl toldy. Bul mereıli data – osyǵan deıin atqarylǵan aýqymdy jumystardy qorytyndylap, artymyzǵa bir qaraıtyn múmkindik. Memleket basshysy Qasym-Jomart Toqaev ulttyq múddelerdi qorǵaýǵa, jastardy patrıottyqqa baýlýǵa, halyqtyń ál-aýqatyn jaqsartýǵa basa nazar aýdarýda. Biz óskeleń urpaqqa ekonomıkasy órkendegen, jurttyń ómir súrý sapasyna tikeleı áser etetin negizgi salalary damyǵan myqty eldi mura qylyp qaldyrýymyz kerek. Al Qazaqstannyń bolashaǵy árbir azamattyń qolynda ekendigin umytpaıyq», - dedi ol.

Olga Býlavkınanyń aıtýynsha, Parlamenttiń zań shyǵarý qyzmeti egemendi eldiń áleýmettik-saıası reformalaryn júzege asyrýǵa mol yqpal etti.

«Parlament ekonomıkany jaqsartý jáne azamattarǵa áleýmettik qoldaý kórsetý úshin osy ýaqytqa deıin talaı mańyzdy zańdy qabyldady. Aldaǵy ýaqytta da biz turǵyndar quqyqtarynyń qorǵalýy, barlyǵyna teńdeı jaǵdaı jasalýy maqsatynda tıisti jumys atqaratyn bolamyz. Azattyqtyń 30 jylynda baǵyndyrǵan belesterdi keleshekte eseleı túsý úshin barsha qazaqstandyq jumyla áreket etedi degen senimdemin», - dedi Senat depýtaty.