Oqjetpestegi tyń emdik shara: Naftalan qandaı aýrýǵa em
ASTANA. KAZINFORM – Búginde Prezıdent Іs basqarmasyna qarasty Medıtsınalyq ortalyqtyń birneshe shıpajaıy bar. Onyń bári Býrabaıda ornalasqan «Oqjetpes» emdeý-saýyqtyrý keshenine biriktirilgen. Naqtyraq aıtsaq, osy keshen quramyna Almatydaǵy «Almaty resort», Reseıdiń Essentýkı qalasynda ornalasqan «Qazaqstan» shıpajaılary kiredi. Bul emdeý-saýyqtyrý ortalyqtaryn iri shıpajaılar deýge bolady. Máselen, 2022 jyly jarııalanǵan reıtıngke sáıkes, Reseıdegi «Qazaqstan» shıpajaıy Essentýkı, Kıslovodsk, Jeleznovodsk syndy qalalarda ornalasqan 150-den astam shıpajaılardyń ishinde úshinshi orynǵa shyǵyp otyr.
«Oqjetpes» zamanaýı shıpajaıǵa aınalady
Prezıdent Іs basqarmasy Medıtsınalyq ortalyǵynyń «Oqjetpes» ESK» AQ prezıdenti ıAkov Sterlıgovtiń aıtýynsha, sońǵy jyldary Býrabaıdaǵy «Oqjetpes» shıpajaıynda kóp dúnıe jasalyp jatyr. «Qazaq Nomad» tujyrymdamasy aıasynda qazaqtyń dástúrli kıim-keshegin, ulttyq taǵamyn, qazaqtyń emdik protsedýralaryn nasıhattaý jumystary qolǵa alynǵan. Shıpajaıǵa japsarlas aýdany 450 sharshy metrlik úlken bólme kúrdeli jóndeýden ótkizilip, sport zaly retinde jabdyqtalǵan. Bólmelerge de kezeń-kezeńmen jóndeý jumystary júrgizilip jatyr. Jalpy, shıpajaı 1998-2002 jyldary aralyǵynda kúrdeli jóndeýge tolyq jabylǵan bolatyn. Sodan keıin kúrdeli jóndeýden ótpegen. Tek qana aǵymdyq jóndeý jumystary júrgizilip turǵan. Al 2021 jyly 6-qabattaǵy 13 standartty nómir kúrdeli jóndeýden ótkizilip, santehnıkalyq jabdyqtary, jıhazdary zamanaýı stılde jańartylǵan.
«Basty maqsatymyz – zamanaýı tehnologııalar, dúnıe júzinde bar jańa tehnologııa, medıtsınalyq jabdyqtar engizý arqyly memlekettik qyzmetshilerge ǵana emes, búkil turǵynǵa jáne shetelden keletin qonaqtarǵa myqty shıpajaıymyzdyń bar ekenin kórsetý. Osyǵan oraı, nómirlik qorymyzǵa jóndeý jumystaryn júrgizip jatyrmyz. Ol jumysty 1 jyldyń ishinde jasaý óte qıyn. 125 nómir bar. Óte kóp qarajat kerek. Sondyqtan jyl saıyn 20-25 nómirden jóndeý jumysyn óz qarajatymyz esebinen jasaımyz. Byltyr 20 nómirdi kúrdeli jóndeýden ótkizsek, bıylǵy josparymyzda 26 nómir bar. Konkýrstyq rásimder ótken soń jumys bastalady», - dedi keshen prezıdenti.
Burynyraq shıpajaı kitaphanasy ǵımarattyń bir shetinde, qaltarysta ornalasqan bolatyn. Ótken jyly ony demalýshylardyń kózine birden túsetin orynǵa qaıtadan jasaqtap, kovorkıng ortalyqqa aınaldyrǵan. Іshinde demalýshylardyń talǵamynan shyǵatyn qazaq jáne álem ádebıetiniń úzdik týyndylary, zamanaýı detektıv janryndaǵy shyǵarmalar, balalarǵa arnalǵan ádebıetter qoıylǵan.
«Ortalyqta Wi-Fi, kompıýter bar. Máselen, qonaqtarymyz 7-10 kúnge demalýǵa keledi. Osy 10 kúnniń ishinde qonaqtarymyzdyń birine jumys barysyna oraı qujattarmen jumys isteý ne naqty bir tapsyrmalardy oryndaý qajettigi týyndaýy yqtımal. Sonda ol kisiler osy kovorkıng ortalyqqa kelip, jumys isteı alady. Al burynǵy kitaphana bólmesin balalardyń shyǵarmashylyq ortalyǵy retinde jasaqtadyq», - dedi ıAkov Sterlıgov.
Shıpajaıda kimder em alady?
«Oqjetpes» shıpajaıynyń atqarýshy dırektory Aıan Aqmurzınniń sózine qaraǵanda, emdelýshiler Prezıdent Іs basqarmasy emhanasynyń joldamasy nemese ony satyp alý arqyly kele alady. Em alýshylardyń jalpy sany jylyna 10 myńnan asady. Keı jyldary 11 myńǵa jýyqtap jatady. Mamyr men qyrkúıek aralyǵy kelýshilerdiń shyrqaý shegi sanalady.
«Jaz mezgilinde astanalyqtardyń kópshiligi Býrabaı aımaǵyna aǵylady. Óıtkeni, bul aımaq elordaǵa jaqyn, 225 shaqyrym ǵana. Jalpy, «Oqjetpes» shıpajaıy tek elordalyqtar úshin ǵana emes Qazaqstannyń barlyq óńiri turǵyndary úshin jaqsy tanys. Qaraǵandy, Almaty oblystarynan, sońǵy ýaqytta Mańǵystaý oblysynan kelýshilerdiń qarasy qalyń. Sondaı-aq jyl saıyn 300-400 sheteldik qonaq qabyldaımyz. Olardyń ishinde AQSh-tan, Ulybrıtanııadan, Eýropa elderinen, Reseı men Ózbekstannan kelýshiler kóp. Jyl saıyn turaqty túrde keletin sheteldik meımandarymyz da bar. Olardyń shıpajaıymyzdy tańdaý sebebi – «Oqjetpes» Ortalyq Azııada №1 sanalady, ıaǵnı eýropalyq standarttarǵa sáıkes sertıfıkattary bar. Shıpajaı 4 juldyzdy. Qonaq úıdiń ózi de, meıramhanasy da 4 juldyzdy. Ol jyl saıyn rastalyp otyr. Munan bólek, osydan 5 jyl buryn Býrabaı irgesindegi «Aq býra» kesheniniń qurylys jumystary bastalyp, búginde aıaqtaldy. Bul nysan da Prezıdent Іs basqarmasynyń sheshimimen «Oqjetpes» kesheni quramyna berilmek. Aldaǵy ýaqytta «Aq býra» aryqtaýǵa arnalǵan ortalyq retinde jumys isteýi múmkin. Munan bólek, Qatonqaraǵaıda da shıpajaı ashý máselesi kóterilip júr», - dedi Aıan Erdenuly.
Onyń dereginshe, shıpajaıdaǵy 2 adamdyq standartty nómirdiń bir kúndik jatyn puly – 78 myń teńge. Onyń ishinde 4 mezgil tamaqtanýy, 1 mezet qymyz, basseın, saýna, sport zaly, kıno zaly, avtoturaq jáne emdik protsedýralar kiredi. Aqyly da emdik protsedýralardy qosymsha alýǵa bolady. Aqyly protsedýrany kelýshiler terapevt dárigerdiń jazyp berýimen óz qalaýyna qaraı alady.
«Tóńiregimizdegi básekelesterdi de qadaǵalap otyramyz. Іri qonaq úıler bar. Biraq, olardyń jatyn pulyna tek tańǵy as qana kiredi. Basqa dym joq. Al bizde qyzmettiń bári keshendi túrde kórsetiledi. Ornalasqan jeri de keremet. Qonaq úıdiń dál aldynda Oqjetpes, oń jaǵynda Kókshetaý taýlary ornalasqan. Qonaq úı artynda tolqyny jaǵalaýǵa uryp Áýlıe kól jatyr. Jumbaq tas ta jaqyn. Halyq arasynda «Oqjetpesten» oryn tabý múmkin emes degen sóz bar. Bul – jalǵan aqparat. Degenmen, jaz mezgilinde óziń qalaǵan ýaqytta oryn bolmaı qalýy múmkin. Óıtkeni, qonaqtarymyz demalystaryn 2-3 aı buryn josparlap, aldyn ala bron jasap, aqshalaryn tólep qoıady. Bizde kelýshilerge birqatar jeńildik bar. Týǵan kún ıelerine, múgedek jandarǵa, zeınetkerlerge, kásipodaq uıymdaryna 10 paıyzdan bastap úlken jeńildikter beremiz. «Oqjetpes» shıpajaıy Mindetti áleýmettik-medıtsınalyq saqtandyrý arqyly qyzmet kórsetpeıdi. Degenmen, bul baǵyttaǵy kómekti «Almaty resort» shıpajaıynan alýǵa bolady. Sońǵy ýaqytta «Oqjetpeste» de MÁMS aıasynda medıtsınalyq qyzmet kórsetý máselesi kóterilip júr. Biraq, oǵan shıpajaıdyń múmkindigi joq. Birinshiden, jatyn-oryn sany jetispeıdi. Ekinshiden, emdik protsedýrasy bólek. Kelýshilerdi MÁMS arqyly qabyldaý úshin jańa emdik protsedýralaryn ázirleý qajet bolady. Jalpy, bul máseleniń jaqyn arada sheshile qoıýy qıyn. Ol úshin jańa ǵımarat salý qajet», - dedi Aıan Aqmurzın.
Naftalanmen emdeý
Shıpajaıdyń emdeý-saýyqtyrý bólimshesine Lıýbov Konapleva basshylyq jasaıdy. Uzaq jyldary boıy Astanaǵy Prezıdent Іs basqarmasyna qarasty Medıtsınalyq ortalyqta laýazymdy qyzmet atqarǵan ol zeınetke shyqqannan keıin shıpajaı basshylyǵynyń shaqyrýymen Býrabaıǵa qonys aýdarǵan.
«Shıpajaıymyzdyń basym baǵyty – memlekettik qyzmetshiler men olardyń otbasy múshelerine, respýblıka jáne TMD elderi turǵyndaryna ońaltýdyń 10 baǵyty boıynsha qyzmet kórsetý. Olar júrek-qan tamyry, tynys alý músheleri, tirek-qozǵalys apparaty, júıke júıesi, qan tamyry aýrýlary sııaqty dertter. Degenmen, basym baǵytymyz tirek-qozǵalys apparaty men júrek-qan tamyry júıesi sanalady. Qazirgi ýaqytta emdeýdiń jańa túrin engizip jatyrmyz. Ol – Naftalanmen emdeý. Bul munaı ónimi jáne buryndary Qazaqstanda qoldanylǵan emes. Ázerbaıjannan ákelingen Naftalanmen emdeýdi bizdiń shıpajaımyz eń birinshi bolyp qolǵa aldy», - dedi Lıýbov Konapleva.
Naftalanmen em-dom jasaıtyn Bátıma Qamarova onyń munaıdan jasalǵan kúshti dári ekendigin aıtady. 70-ten astam aýrýǵa em bul dárini adamdar 12 ǵasyrdan beri emdik baǵytta qoldanyp keledi eken.
«Ol qannyń tutqyrlyǵyn tómendetedi, ımmýnıtetti kóteredi. Ókpeniń jumysyn jaqsartady. Aǵzadaǵy qabyný protsesterin toqtatady. Analgetıkalyq áseri bar. Býyn, tirek-qozǵalys júıesine áseri mol. Ekzema, psorıaz sııaqty álemde kezdesetin kez kelgen dermatıt aýrýlaryn emdeıdi. Ázerbaıjan keńes zamanynan-aq osy Naftalanmen emdeý júıesin jolǵa qoıǵan. Qazaqstan azamattary dál osy emdi alý úshin sol elge baratyn. Al biz Naftalanmen emdeýdi osydan jarty jyl buryn qolǵa aldyq. Alǵashqy ýaqytta em alýshylar sany az bolatyn. Búginde kúnine keminde 10 adam osy emdi alyp jatyr. Suranys artýda. Emdelýshiler bir-birinen de estip keledi», - dedi dáriger.
Onyń atap ótýinshe, onkologııaǵa shaldyqqandar, týberkýlezdiń ashyq túrine ushyraǵandar, aǵzasynda ótkir juqpaly aýrýy, qan qysymy, júrek aýrýy barlar Naftalanmen em ala almaıdy.
Lıýbov Konaplevanyń aıtýynsha, shıpajaıda fızıkalyq terapevtıkalyq kabınetter, tıptik sýmen emdeý orny jáne sebezgi zaly, balshyqpen emdeý orny, ýrologııa, stomatologııa, massaj jáne em-sharalar kabınetteri, ishekti monıtorlyq tazalaý kabıneti, ıngalıator, fıtobar, zerthanalyq-dıagnostıkalyq bólimshe, kosmetologııalyq kabınet, dárihana ornalasqan. Emdeý ǵımaratynda ótkizilgen terapııanyń tıimdiligi men qaýipsizdigin baqylaýǵa múmkindik beretin qýatty aspaptyq baza bar.
