«Oqjetpes-T» mekemesinde qarjy jymqyrýmen baılanysty jańa derekter shyqty
QARAǴANDY. QazAqparat - «Oqjetpes-T» memlekettik kommýnaldyq mekemesinde sybaılas jemqorlyqpen kúres organdary aqsha jymqyrýǵa qatysty taǵy bir qylmystyq isti qarap jatyr, dep habarlaıdy «QazAqparat» HAA tilshisi.
Mekeme basshysy Erlan Óteshov qazirgi ýaqytta senip tapsyrylǵan bóten múlikti ıelenip alǵan nemese ysyrap etken degen aıyppen qamaýda otyr. Aqsha urlaýǵa qatysty jańa derekter sý jáne jylý qubyrlary júıesindegi jóndeý jumystaryna arnalǵan kólikti jalǵa alýmen baılanysty bolyp otyr.
Prokýrorlyq tekseris nátıjesinde memlekettik mekeme fırmalardan arnaıy tehnıkany jalǵan jolmen alyp otyrǵany anyqtalǵan. Tórt túrli JShS-niń barlyǵynda birdeı tehnıka kórsetilgen. Al bir kóliktiń bir ýaqytta barlyq fırmalarda bolýy múmkin emes. Biraq «Oqjetpes-T» býhgalter bólimi jalǵa alatyn aqshany tórt fırmanyń da esepshotyna salyp otyrǵan. Kólikti jalǵa alatyn qarajat somasy bir mıllıonnan úsh mıllıon teńgege deıingi kólemde.
«Qazirgi ýaqytta ártúrli fırmalarmen kelisimsharttaǵy kóliktiń kimge tıesili ekeni tekserilip jatyr. Buǵan «Oqjetpes-T» memlekettik mekemesi basshylyǵynyń qatysy bar-joqtyǵy anyqtalýda», - dep habarlady Temirtaý prokýratýrasy.
Qylmystyq is Qylmystyq kodekstiń 189 baby (« Senip tapsyrylǵan bóten múlikti ıelenip alý nemese ysyrap etý») boıynsha tergelip jatyr.
Esterińizge sala keteıik, 31 mamyrda Temirtaý qalalyq soty «Oqjetpes-T» memlekettik kommýnaldyq mekemesiniń dırektory Erlan Óteshevti «qamaýda ustaý» týraly sheshimdi maquldaǵan. Sýdıa Shervan Aıýbekova kúdiktini eki aıǵa qamaýǵa alý týraly úkim shyǵardy. Erlan Óteshov pen «Kaz Temir stell» JShS menedjerine Qylmystyq kodekstiń 189 baby, 3 bólimi boıynsha «Senip tapsyrylǵan bóten múlikti ıelenip alǵan nemese ysyrap etken» degen aıyp taǵylyp otyr.
Tergeýdiń aldyn ala joramaldaryna sensek, Erlan Óteshov Temirtaý sý jáne jylý magıstraldaryndaǵy qubyrlardy jóndeýge eski materıaldardy satyp alyp, ony qujatta joǵary baǵamen kórsetip otyrǵan. Artyq aqshany menedjermen kelisip bólip alǵan. Ulttyq bıýro qyzmetkerleri qubyrlardy Ulttyq saraptaý jáne sertıfıkatsııa ortalyǵyna tekseriske jiberdi. Qorytyndyda kórsetilgendeı, qubyrlardyń qabyrǵalary eskirgen, sapa talaptaryna sáıkes kelmeıdi, korrozııaǵa ushyraǵandyǵy baıqalady. Sot býhgalterlik ekspertıza «Oqjetpes-T» memlekettik mekemesine 27 mıllıon 500 myń 829 teńge kóleminde shyǵyn kelgendigin anyqtady.
Sheneýnik osyǵan deıin mas kúıde kólik apatyna sebepker bolyp, sonyń áserinen áıel adam kóz jumyp, eki adam zardap shekken bolatyn. Nátıjesinde Óteshov Qaraǵandy oblystyq energetıka basshysy qyzmetinen ketip, sonymen qatar, 4 jylǵa júrgizýshi kýáligi men «Nur Otan» partııalyq bıletinen aıyrylǵan bolatyn. Kólik apatyna qatysty qylmystyq is eki jaqtyń kelisimimen toqtatylǵan.
