«Oqjetpes» pen «Qaırat» arasyndaǵy oıyn keıinge shegerildi

ASTANA. KAZINFORM – Kókshetaýlyq «Oqjetpes» pen «Qaırat» fýtbol klýbynyń arasyndaǵy match almatylyq komandanyń eýrokýbok básekesine qatysýyna baılanysty keıingi ýaqytqa aýystyryldy. 

24 tamyz kúni ótýi tıis bolǵan oıyn qos taraptyń kelisimimen 31 tamyz kúnine shegerildi. 

QPL kúntizbesindegi kesteni basqa kúnge qoıýdyń basty sebebi, «Qaırat» 26 tamyz kúni Chempıondar lıgasynyń pleı-off kezeńinde «Seltıkke» qarsy qarymta oıynyn ótkizedi.

Eske sala keteıik, buǵan deıin «Qaırat» UEFA Chempıondar lıgasynyń úshinshi irikteý kezeńinde Slovakııanyń «Slovan» komandasynan qos oıyn qorytyndysy boıynsha basym túsken bolatyn. Osylaısha almatylyq ujym Chempıondar lıgasynyń pleı-off satysyna joldama aldy.

Al, elordalyq «Astana» Konferentsııa lıgasynyń úshinshi irikteý kezeńinde óz alańynda Shveıtsarııanyń «Lozanna» komandasynan jeńilip, jarysty jarty joldan aıaqtady.