«Oqjetpes» Qazaqstan quramasynyń burynǵy oıynshysyn qataryna qosyp aldy
KÓKShETAÝ. QazAqparat - Jartylaı qorǵaýshy Ulan Qonysbaev kásibı mansabyn Premer-lıgaǵa oralǵan «Oqjetpes» quramynda jalǵastyratyn boldy, dep habarlaıdy QazAqparat «SPORTINFORM»-ǵa silteme jasap.
Transfer terezesiniń sońǵy kúni kókshetaýlyqtar Qazaqstan quramasynyń burynǵy oıynshysy Ulan Qonysbaevty qatarǵa qosyp úlgerdi. Ótken maýsymda ol «Aqtóbe» sapynda oınaǵan bolatyn.
Eske sala keteıik, Qonysbaev Qazaqstan jáne Qytaı quramalary arasyndaǵy joldastyq kezdesýde alǵan aýyr jaraqatyna baılanysty eki jyldan astam ýaqyt dop tebe almaǵan edi. Uzaqqa sozylǵan úzilisten keıin oınaǵan alǵashqy klýby «Aqtóbe» boldy.
Ulan 1989 jyly týǵan. Boıy - 176 sm, salmaǵy - 62 kg. Jambyl fýtbol mektebiniń túlegi. Qazaqstan Premer-lıgasynda alǵash ret 2008 jyly «Taraz» sapynda Oraldyń «Aqjaıyǵyna» qarsy oınady. Ár jyldary «Astana», «Shahter», «Qaırat», «Aqtóbe» sapynda óner kórsetti. Qazaqstan quramasyndaǵy debıýti 2011 jyldyń 9 aqpanynda Belarýsqa qarsy joldastyq kezdesýde boldy. Jalpy, ulttyq qurama sapynda 32 oıyn ótkizip, 3 gol soqqan.
Aıta keteıik, buǵan deıin «Oqjetpes» quramyna Qazaqstan quramasynyń lıderi bolǵan Tańat Nóserbaev ta kelip qosylǵan edi. Ótken týrda ol ózi tárbıelengen «Ordabasy» komandasyna qarsy oıynda kapıtan boldy.
