«Oqjetpes» fýtbol klýbyna jańa dırektor taǵaıyndaldy
KÓKShETAÝ. QazAqparat - Aqmola oblystyq MMA federatsııasynyń basshysy Erlan Bótembaev «Oqjetpes» fýtbol klýbynyń dırektory bolyp taǵaıyndaldy, dep habarlaıdy QazAqparat tilshisi fýtbol klýbynyń resmı saıtyna silteme jasap.
«Aǵymdaǵy jyldyń qańtar jáne aqpan aılarynda Aqmola oblysynyń dene shynyqtyrý jáne sport basqarmasy «Oqjetpes» fýtbol klýby» Sharýashylyq júrgizý quqyǵyndaǵy memlekettik kommýnaldyq kásipornynyń dırektory laýazymyna baıqaý jarııalaǵan bolatyn. Baıqaýǵa bes kandıdat qatysty. Olardyń arasynan Erlan Dúısenuly Bótembaev tańdalyp, 16 aqpanda «Oqjetpes» fýtbol klýbynyń dırektory qyzmetine taǵaıyndaldy», dep kórsetilgen habarlamada.
E.Bótembaev 1974 jyldyń 17 qarashasynda týǵan. Şýche pedagogıkalyq kolledjin «dene shynyqtyrý, sporttyq klýbtar men úıirmelerdi uıymdastyrýshy», E.Bóketov atyndaǵy Qaraǵandy Memlekettik ýnıversıtetin «quqyqtaný», «Kókshe» akademııasyn «dene shynyqtyrý jáne sport» mamandyqtary boıynsha támámdaǵan.
Aqmola oblysynyń jastar kúres federatsııasynyń atqarýshy dırektory, «Aralas jekpe-jek jáne djıý-djıtsý respýblıkalyq federatsııasy» qoǵamdyq birlestiginiń sport boıynsha dırektory, «Aqmola áýesqoı boks federatsııasy» qoǵamdyq birlestiginiń dırektory jáne «Býrabaı» sport saraıynyń dırektory laýazymdarynda boldy.
Erlan Bótembaev qazirgi ýaqytta, sondaı-aq Aqmola oblysynyń MMA federatsııasyn basqarýda.
