«Oqjetpes» fýtbol klýby Túrkııada alǵashqy oqý-jattyǵý jıynyn ótkizdi
ALMATY. 28 jeltoqsan. QazAqparat /Erlik Erjanuly/ - Kókshetaýdyń «Oqjetpes» fýtbol klýby Túrkııadaǵy alǵashqy oqý-jattyǵý jıyny kezinde keshe Reseıdiń Voronej qalasynyń «Fakel» komandasymen joldastyq kezdesý ótkizdi.
Vıktor Dogadaılo tizginin ustaǵan kókshetaýlyq aıaqdopshylar bul oıynda qarsylastaryna 0:3 esebimen ese jiberdi. Olar buǵan deıin 22-jeltoqsanda Túrkııanyń «Antalıaspor» klýbynyń qosalqy quramyn 2:1 esebimen utqan bolatyn.
«Oqjetpes» komandasy Túrkııadaǵy 2 aptalyq alǵashqy oqý jattyǵý jıynyn búgin aıaqtap, erteń Kókshetaýǵa oralmaq. Bul jıynǵa 30 fýtbolshy shaqyrylǵan bolatyn. Olardyń 14-i komandanyń óz oıynshylary, altaýy qazaqstandyq ózge komandalardan bolsa, al 10-y sheteldik legıonerler. Jalpy «Oqjetpestiń» qosalqy quramy da keshe Stepnogor qalasyndaǵy «Aqsý» stadıonynyń bazasynda ótken alǵashqy oqý-jattyǵý jıynynan oralǵan edi. Oǵan 1993-1995 jyldary týǵan 28 aıaqdopshy qatysty.
