«Oqjetpes» FK bas dırektory: Andreı Karpovıchke úlken mindetter júktelip otyr
KÓKShETAÝ. QazAqparat - Kókshetaýdyń «Oqjetpes» fýtbol klýbyna bas jattyqtyrýshy bolyp taǵaıyndalǵan Andreı Karpovıch BAQ quraldaryna tanystyryldy, dep habarlaıdy QazAqparat tilshisi.
«Oqjetpes» fýtbol klýbynyń dırektory Erlan Bótembaevtyń aıtýynsha, komanda aldaǵy maýsymda premer-lıgada joǵary nátıjege qol jetkizýdi kózdep otyr.
«Búgin bizdiń komandada úlken oqıǵa bolyp otyr. Ol Andreı Karpovıchtiń bas jattyqtyrýshy bolyp taǵaıyndalýy. Jattyqtyrýshy retinde tájirıbesi az bolǵanymen Andreıdiń jetistikteri óte zor. Ótken jyly «Qaırattyń» sapynda bas jattyqtyrýshynyń mindetin atqarýshy retinde Qazaqstan kýbogin ıelendi. Al, «Qaırat» sapynda álsiz oıynshylar oınamaıdy. Sondyqtan, jańa bas jattyqtyrýshyǵa úlken mindetter júktelip otyr», - deıdi Erlan Bótembaev.
Sonymen qatar, bas dırektor premer-lıga maýsymynda komandanyń quramynyń jańartylý sebepterin túsindirdi.
«Birinshi lıgamen premer-lıgany múldem salystyrýǵa bolmaıdy. Bul ekeýi eki deńgeı. Ótken jylǵy jattyqtyrýshy Sergeı Popkovty nashar maman dep aıta almaımyz. Onymen kelisimshartymyz aıaqtaldy. Alaıda, byltyrǵy jylǵy jetistikpen toqmeıilsip qalmaı, jańa bıiktikterdi baǵyndyrýymyz kerek. Sol úshin jańa oıynshylardy shaqyratyn bolamyz», - dep tolyqtyrdy Erlan Bótembaev.
Eske sala keteıik, osyǵan deıin habarlaǵanymyzdaı Andreı Karpovıch Kókshetaýdyń «Oqjetpes» fýtbol klýbynyń bas jattyqtyrýshysy bolyp taǵaıyndalǵan bolatyn.
