Oqyrmandar arasynda «Ábish álemi» atty kórkemsóz oqý sheberleriniń baıqaýy bolyp ótti

dep habarlaıdy QazAqparat.

Bul baıqaýǵa qaladaǵy kitaphanalardyń oqyrmandary qatysty. Onyń ishinde birqatar mektep, gımnazııalardyń oqýshylary men joǵarǵy oqý oryndarynyń stýdentteri de bar.

Baıqaýda mektep oqýshylary men stýdentter Ábish Kekilbaıulynyń prozalyq shyǵarmalarynan úzindi oqyp berdi. Birneshe aýdarmalaryn jáne buryn jaryq kórmegen óleńderin de oqydy. Qatysýshylar negizinen Ábish Kekilbaıulynyń jastyq shaqta jazǵan óleńderin toptastyrǵan «Dúnıe ǵapyl» kitabynda jarııalanǵan óleńderdi mánerlep oqydy. Ómir, qoǵam jaıly tereń tolǵanatyn aqyn Ábish jas kezinde-aq «Bul dúnıeniń ǵapylyn mol ańǵardym» dep jazǵan eken. Osy kúni oqyrmandar kemeńger jazýshynyń aqyndyq qyrymen jaqynyraq tanysty.

Baıqaý qorytyndysynda №40 mekteptiń oqýshylary Abylaıhan Orazálıev pen Mádına Jaqypova birinshi oryndy jeńip aldy. Olar Ábish Kekilbaıulynyń aýdarmalary ishinen «Romeo men Djýleta» dastanynan úzindini sahnaǵa shyǵardy. «Mahabbat munarasy» týyndysynan úzindini sheber oqyǵan L. Gýmılev atyndaǵy Eýrazııa ulttyq ýnıversıtetiniń ІІІ kýrs stýdenti Orazgúl Maqsutova ekinshi orynǵa ıe boldy. Bala Ábishtiń rólinde oınaǵan №37 mekteptiń shákirti Aıbek Muhambetqalıǵa úshinshi júlde tabys etildi.

Birqatar shákirtterge yntalandyrý syılyqtary berildi. Sonymen qatar kórkem shyǵarmany oqýda óz yntalaryn bildirgen oqýshylarǵa belsendi oqyrmandar syılyǵy tabys etildi.

6 jasar Janerke Jaqsylyq jazýshynyń «Aıý men dári» atty mysalyn jatqa oqyp berdi. Qazylar alqasy Janerkeni arnaıy syılyqpen marapattap, bolashaqta rýhanı baılyqqa kenele berýine tilek bildirdi.

Osy sharany uıymdastyrǵan «Astana qalasynyń ortalyqtandyrylǵan kitaphanalar júıesi» memlekettik mekemesiniń dırektory, qazylar alqasynyń tóraǵasy Saparǵalı Medeýbekov osy baıqaýǵa jıyrmadan astam talapker qatysqanyn aıtty. «Ábish Kekilbaıulynyń 70 jasqa tolýy qarsańynda osyndaı shara uıymdastyryp otyrmyz. Astana qalalyq ákimdigi men mádenıet basqarmasynyń tapsyrmasy bar. «Barsha qazaqtyń Ábishi» atty kórme uıymdastyryldy. Bizge qarasty barlyq kitaphanalarda da osyndaı taqyryppen kórme jasalyp otyr. Endi astanalyq mektepterde de zamanymyzdyń áıgili qalamgeriniń mereıtoıy qurmetine ádebı keshter ótkiziledi. Mektepterdegi kórmelerdiń uıymdastyrylýyna bizder atsalysamyz. Ábish shyǵarmalaryn naqyshyna keltirip oqyǵan, obrazǵa kirip, jazýshy keıipkerlerin sahnalaı bilgen talapkerlerge syı-sııapat jasap, júldelermen marapattadyq»,- dedi Saparǵalı Medeýbekov.