Oqýshynyń taýdan syrǵanap mert bolýyna qatysty qylmystyq is qozǵaldy-ShQO
ÓSKEMEN. QazAqparat - Óskemenniń irgesindegi «Nurtaý» shańǵy bazasynda 17 jastaǵy qyzdyń qaıtys bolýyna baılanysty qylmystyq is qozǵaldy, dep habarlaıdy QazAqparat tilshisi.
Syrǵanaq teýip júrgen oqýshylardyń biri rezeńke ballonnan aýnap, sońy qaıǵyly oqıǵamen aıaqtaldy.
«Nurtaý» ujymy marqumnyń týystary men jaqyndaryna qaıǵyra kóńil aıtady. Ókinishke oraı, qyzmetkerlerdiń eskertýi men tyıym salǵan belgilerge qaramastan, eki synyptas ruqsat etilmegen jerden syrǵanaǵan. Rezeńke ballonmen syrǵanaý úshin baza da arnaıy jol tóselgen. Al bular shańǵynyń jolymen túspek bolǵan. Jaraqat alǵan qyz arnaıy tasymaldaǵyshpen tómenge túsirilip, kezekshi dáriger shaqyryldy. Biraq ony qutqaryp qalý múmkin bolmady. Qazir bazada tergeý jumystary júrip jatyr» delingen demalys ornynyń «Instagramdaǵy» paraqshasynda.
Qaıǵyly oqıǵa keshe bolǵan. Búgin osyǵan baılanysty Óskemen qalasynyń bilim bólimi málimet taratty.
«Nurtaýǵa» saıahatty №32 mektep Densaýlyq kúnine oraı uıymdastyrǵan. Ata-analardyń ótinishi boıynsha mektep basshylyǵy saıahatqa ruqsat bergen bolatyn» - delingen ol aqparatta.
21 oqýshy mingen avtobýs mektepten tańǵy saǵat 9.00-de shyqqan. Qastarynda synyp jetekshileri men ata-analar komıtetiniń ókilderi bolǵan. Qaıǵyly jaǵdaı týraly málimet mektep dırektoryna 10.53-te aıtylypty.
Bul oqıǵa oblystyq ishki ister departamentiniń baqylaýyna alyndy.
«Osy oqıǵaǵa baılanysty QR Qylmystyq kodeksiniń 141-baby boıynsha sot aldy tergeý jumystary júrip jatyr. Atalmysh bap balalardyń ómiri men densaýlyq qaýipsizdigin qamtamasyz etý jónindegi mindetterdi tıisinshe oryndamaý faktilerin qamtıdy. Oqýshylar syrǵanaq tebýge arnalmaǵan jolmen túsken. Oǵan qalaı jol berilgenin tergeý sharalary anyqtaıdy» - deıdi ІІD baspasóz qyzmeti.
Marqumnyń janynda bolǵan oqýshynyń qoly synǵan. Qazir ol úıinde.
Foto: fsmsolicitors.co.uk
