Oqýshynyń qudyqqa qulap, mert bolýy: Elorda ákimi jaýapty tulǵalarǵa sógis jarııalady
ASTANA. QazAqparat - Astana ákimdiginde qala basshysy Baqyt Sultanovtyń tóraǵalyǵymen kezekti otyrys ótti. Onyń barysynda elorda ákimi jaqynda oqýshy balanyń káriz qudyǵyna qulap, mert bolýyna baılanysty ýákiletti tulǵalarǵa qatań sógis jarııalady, dep habarlaıdy QazAqparat tilshisi.
Baqyt Sultanov qaıǵyly oqıǵa qaıtalanyp otyrǵanyn atap ótti.
«Ókinishke qaraı, 19 aqpan kúni taǵy bir qaıǵyly oqıǵa tirkeldi. 13 jasar jasóspirim qaladaǵy ashyq qudyqtyń birine qulap, qaza tapty. Bul tótenshe jaǵdaı taǵy da Almaty aýdanynda tirkelip otyr. Ashyq qudyq «Astana sý arnasy» memlekettik kásipornyna (2013 jyldan bastap) tıesili», - dedi qala basshysy.
Ákim osydan birneshe aı buryn jasósipirim qyz dál osyndaı jaǵdaıda mert bolǵanda aýdan ákimderine, naqty aıtqanda, Almaty aýdany ákiminiń orynbasaryna, jol-kólik basqarmasynyń basshysyna, «Astana Tazalyq» JShS dırektorynyń orynbasaryna qatań sógis jarııalaýmen ǵana shektelgenin aıtty.
«Bul jazalaý túri sizderge az sııaqty bolyp otyr. Endeshe, Almaty aýdanynyń ákimi Ádilbek Sársenbaevqa, Otyn-energetıkalyq keshen jáne kommýnaldyq sharýashylyq basqarmasy basshysynyń orynbasary Igor Alekseevke, «Astana sý arnasy» memlekettik mekemesiniń basshysy Tabıǵat Zeınýlqabdenge, káriz qyzmetiniń basshysy Qýanysh Sultanbaevqa jáne «Almaty» aýdany káriz ýchaskesiniń basshysy Vladımır Vlasenkoǵa qatań sógis jarııalaımyn», - dedi B.Sultanov.
Eske sala ketsek, Astanada birneshe kún boıy izdestirilgen 13 jasar jasóspirimniń óli denesi qaladaǵy qudyqtardyń birinen tabylǵan bolatyn. Oqıǵadan birneshe kún buryn ǵana anasymen birge serýendep júrgen 5 jasar bala ashyq qudyqqa qulap ketken edi. Oqıǵa Qarasaı batyr kóshesi boıynda boldy. Abyroı bolǵanda, bala din aman qutqaryldy. Qutqarýshylar kelgenshe tereńdigi 2 metr qudyqqa №39 mekteptiń 10-synyp oqýshysy túsip, baldyrǵandy alyp shyqty.
Budan bólek, ótken jyldyń 26 qarashasy kúni 14 jastaǵy qyz káriz qudyǵyna qulap, mert boldy. Osy oqıǵadan keıin shahar basshysy Baqyt Sultanov qudyqtardy kúndelikti tekserýdi tapsyrdy.
