Oqýshyny urǵan muǵalim sotta jaýap beretin boldy
TALDYQORǴAN. QazAqparat - Almaty oblysynda oqýshyny urǵan muǵalim tóńiregindegi daý ýshyǵa tústi. 7-shi synyp oqýshysyn sabaǵan hımııa pániniń muǵalimi endi bul áreketi úshin sot aldynda jaýap beredi dep, habarlaıdy «QazAqparat» HAA tilshisi.
Qazir atalǵan oqıǵa boıynsha QR Qylmystyq kodeksiniń 107 babymen (densaýlyqqa qasaqana aýyrlyǵy ortasha zııan keltirý) sot aldy tergeý jumystary bastalyp ketti dep, habarlady Almaty oblystyq ІІD baspasóz qyzmetiniń jetekshisi Aıman Myrzekova.
Esterińizge sala keteıik, áleýmettik jelide belgisiz áıel adamnyń oqýshyny tópelep uryp jatqan beınejazbasy paıda bolyp, kópshiliktiń narazylyǵyn týǵyzǵan edi.
Sońynan anyqtalǵandaı, oqýshy men muǵalim arasyndaǵy kıkiljiń Іle aýdanyna qarasty Baıserke aýylyndaǵy №9 mektepte oryn alǵan. Oblystyq bilim basqarmasynyń bergen aqparatyna sáıkes, muǵalimnen taıaq jegen 7 -shi synyp oqýshysy ustazdyń qyzyn urǵan kórinedi. Osy áreketi úshin ashýǵa býlyqqan muǵalim úzilis kezinde synypqa kelip balaǵa esesin qaıtarǵan. Qazir balasyn jaqtaǵan muǵalim Mıra Mamedalıeva jumystan shyǵaryldy .
