Oqýshyny urǵan ákimniń isi Ádep keńesinde qaralady - Aqmola oblysynyń basshysy
KÓKShETAÝ. QazAqparat - Mektep oqýshysyn uryp, áleýmettik jelini shýlatqan Qorǵaljyn aýyldyq okrýginiń ákimine qatysty tekseris qorytyndysy Aqmola oblysynyń Ádep jónindegi keńesinde qaralady. Bul týraly aımaq basshysy Málik Myrzalınniń tóraǵalyǵymen ótken ákimdik otyrysynda aıtyldy, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Otyrysta kóktemgi sý tasqynynyń aldyn alý baǵytynda qolǵa alynǵan sharalardyń barysy, bilim jáne ǵylymdy damytý boıynsha memlekettik baǵdarlamalardy júzege asyrýdyń qorytyndylary talqylandy.
Sonymen qatar, aımaq basshysy Málik Myrzalın Qorǵaljyn aýyldyq okrýginiń ákimi Janat Omarovtyń kámelettik jasqa tolmaǵan balanyń densaýlyǵyna zalal keltirý oqıǵasyna baılanysty polıtsııa, densaýlyq saqtaý jáne bilim organdary tekserý júrgizip jatqanyn atap ótti.
«Tekseris qorytyndysy oblystyń Ádep jónindegi keńesinde qaralatyn bolady», - dedi oblys basshysy.
Eske sala keteıik, Qorǵaljyń aýyldyq okrýginiń ákimi J.Omarovtyń kámelettik jasqa tolmaǵan Muqan Dıasty soqqyǵa jyǵýyna qatysty taralǵan aqparatqa baılanysty QR QK 107-baby 2-bóligi boıynsha sotqa deıingi óndiris júrgizilip jatyr. Sot-medıtsınalyq saraptama taǵaıyndaldy. Tergeý qorytyndysy boıynsha ákimniń áreketine quqyqtyq baǵa berilip, naqty protsessýaldy sheshim qabyldanatyn bolady.
Foto: sko.enbek.gov.kz
