Oqýshyny urdy dep aıyptalyp jatqan muǵalimdi ata-analar jaqtap otyr
AQTÓBE. QazAqparat - Oqýshy qyzdy urdy dep aıyptalyp jatqan ustaz Mádına Jumabaevany №10 orta mekteptiń ata-analary men ujymy «jaqsy muǵalim» dep baǵalady, dep habarlaıdy QazAqparat tilshisi.
Aqtóbede №10 mektep oqýshysynyń ata-anasy «qyzymdy uryp-soqty, densaýlyǵyna zııan keltirdi» dep ustazy Mádına Jumabaevany sotqa berdi. Ustaz Qylmystyq kodekstiń «Densaýlyqqa qasaqana jeńil zııan keltirý» baby boıynsha sot aldynda jaýap berip jatyr. Búgin aıyptalýshyny mekteptiń ata-analary men ujymy jaqtap, óz pikirlerin ashyq bildirdi.
«Mádına Qojantaıqyzy 23 jyldyq eńbek ótili bar joǵary bilimdi maman. Bizdiń balalarymyzǵa deıin de 16 jylda 4 toptyń oqýshylaryna tálim bergen. Balalarymyz mektep tabaldyryǵynan attaǵan kúni-aq baýyryna basyp, qolyna qalam ustatyp, álippeni úıretti. Ustaz úshin janymyz shyryldyp kelip turmyz. Ustazdyń eńbegi baǵalanyp, halyq aldynda kórinse eken dep júrmiz», - dedi ata-ana Gúlzýhra Meńdimuratova.
Aıta keteıik, Mádına Jumabaeva oqýshy men ustaz arasyndaǵy arazdyqtan soń basqa bilim ordasyna aýysyp ketti.
«Mádına Jumabaeva óz erkimen jumystan shyǵyp ketti. №10 orta mektepte muǵalim bolyp júrgeninde oqýshylardan shaǵym túspedi, aryz bolǵan joq. Myna jaǵdaıǵa baılanysty qandaı da bir pikir bildire almaımyn. Sot aq-qarasyn sheshedi. Bir aıtarym, qalalyq bilim bólimi is boıynsha saýalnama júrgizdi. Nátıjesinde balany uryp-soqqany anyqtalmady. Al 3-synyp oqýshysy ózge balalar sekildi belsendi. Ondaı oqýshylar qazir kóp», - dedi №10 jalpy bilim beretin orta mektep dırektorynyń orynbasary Názııa Elbaeva. Onyń aıtýynsha, erteń bolatyn sot otyrysyna psıholog pen muǵalim barady.
