Oqýshyny soqqyǵa jyqqan ákim isi: Sot-medıtsınalyq saraptama taǵaıyndaldy
ASTANA. QazAqparat - Qorǵaljyń aýyldyq okrýgi ákiminiń 8-shi synyp oqýshysyn soqqyǵa jyǵýyna qatysty Aqmola oblystyq ishki ister departamenti búgin resmı túsinikteme berdi, dep habarlaıdy QazAqparat.
«Buqaralyq aqparat quraldarynda Qorǵaljyń aýyldyq okrýginiń ákimi J.Omarovtyń kámelettik jasqa tolmaǵan Muqan Dıasty soqqyǵa jyǵýyna qatysty taralǵan aqparatqa baılanysty qazirgi ýaqytta QR QK 107-baby 2-bóligi boıynsha sotqa deıingi óndiris júrgizilip jatqanyn habarlaımyz. Sot-medıtsınalyq saraptama taǵaıyndaldy. Onyń nátıjesinde ákimniń áreketine quqyqtyq baǵa berilip, naqty protsessýaldy sheshim qabyldanatyn bolady»,- delingen oblystyq ishki ister departamenti taratqan aqparatta.
Eske sala keteıik, Qorǵaljyn aýdanynyń turǵyny Aıgúl Bekjanova Feısbýk áleýmettik jelisine A.Tóleýbaev atyndaǵy orta mektepte oqıtyn uly, 8-synyp oqýshysy Dıas Muqandy Qorǵaljyn aýyldyq okrýginiń ákimi Janat Omarov soqqyǵa jyqandyǵy týraly jazǵan bolatyn. Onda zardap shekken balanyń anasy ulynyń «mıdyń shaıqalýy» dıagnozymen Qorǵaljyn aýdandyq aýrhanasyna, keıin Astana qalasyndaǵy №2 aýrýhanasyna jetkizilgenin aıtqan edi. Bul jazba kópshilik arasynda narazylyq týdyryp, áleýmettik jeli qoldanýshylary oqýshyǵa qol kótergen ákimniń isin qatań synǵa aldy.
Osy másele boıynsha QazAqparat HAA tilshisi prokýratýra organdaryna saýal joldady. QR Bas prokýratýrasynyń baspasóz qyzmeti Muqan Dıastyń densaýlyǵyna zııan keltirý faktisi boıynsha Qorǵaljyn aýdandyq ishki ister bólimimen qylmystyq is qozǵalyp, tergelip jatqanyn atap ótti.
