Oqýshyny qaqqan avtobýs júrgizýshisi qylmystyq jaýapqa tartylýy múmkin - Qostanaı
QOSTANAI. QazAqparat - Polıtseıler 15 jasar qyzdy qaǵyp ketken 61 jastaǵy avtobýs júrgizýshisin tergep jatyr, dep habarlaıdy QazAqparat oblystyq ІІD baspasóz qyzmetine silteme jasap.
Oqıǵa búgin Gashek kóshesiniń boıynda bolǵan. HQKO aıaldamasy mańyndaǵy jaıaý júrginshiler jolaǵynda ótip bara jatqan 15 jasar qyzdy avtobýs qaqqan.
«23 qazan kúni saǵat 07:52-de ІІD-niń kezekshi bólimine avtobýs júrgizýshisiniń 15 jasar qyzdy qaǵyp ketkeni týraly habar kelip tústi. Jol-kólik oqıǵasynan soń mektep oqýshysy oblystyq aýrýhananyń jansaqtaý bólimine jetkizildi. Qazirgi ýaqytta 61 jastaǵy júrgizýshige qatysty QR QK 345-baby, 2-tarmaǵy (Jol qozǵalysy erejeleriniń buzylýy) boıynsha sotqa deıingi tergep-tekserý sharalary bastaldy», - dep jaýap berdi ІІD baspasóz qyzmetiniń jetekshisi Irına Bejenar agenttik tilshisiniń saýalyna.
Al oblystyq balalar aýrýhanasynyń bas dárigeri Igor Belobrjıtskıı oqýshynyń jaǵdaıy aýyr ekenin jetkizdi. Onyń sózinshe, qyzǵa jabyq bas súıek-mı jaraqaty, ókpeniń soǵylýy, tórt qabyrǵasy men buǵanasynyń synýy jáne travmatıkalyq shok dıagnozdary qoıyldy.
