Oqýshyny 17 adamnyń zorlaý isi: Qyzdyń anasy kúdiktilerden 8 mln teńge alǵanyn aıtty
TÚRKІSTAN. QazAqparat - Túrkistan oblysynda 17 adamnyń jas qyzdy zorlaý áreketi boıynsha óńirdiń bas polıtseıi pikir bildirdi. Qaırat Dálbekovtyń aıtýynsha, jábirlenýshiniń anasy kúdiktilerden 8 mıllıon teńge alǵanyn ózi habarlaǵan, dep habarlaıdy QazAqparat tilshisi.
«Áleýmettik jelide Saryaǵash aýdanynda 17 er adamnyń qyzdy zorlaǵany týraly aqparat shyqqany belgili. Osy aýdanǵa jeke ózim baryp, qyzdyń anasymen jáne ózimen advokat pen jýrnalıstiń qatysýymen kezdestim. Tergeý barysynda sot-medıtsınalyq saraptama ortalyǵynyń qyzmetkerleri zorlyq-zombylyq deregin joqqa shyǵardy. Sondaı-aq anasy qyzynyń kıimin óz qolymen órtegenin moıyndady. Osyǵan baılanysty sarapshylar saraptama júrgize almady. Oǵan qosa kúdiktilerden 8 mıllıon teńge alǵanyn da anasy ózi habarlap otyr.
Sondyqtan jynystyq qol suǵylmaýshylyǵyna qatysty qylmystyq isterdi tergeý kezinde tergeý kúdiktilerdiń kinásin tek saraptama nátıjelerine súıene otyryp anyqtaýǵa bolatynyn túsindirgim keledi. ıAǵnı bul iste saraptama asa mańyzdy, sol arqyly zorlyq bolǵan bolmaǵany anyqtalady.
Qazir bul is Túrkistan oblystyq Polıtsııa departamenti Tergeý basqarmasynyń óndirisinde. Saraptama kesheni taǵaıyndaldy. Nátıjeleri boıynsha zańdy protsessýaldyq sheshim qabyldanatyn bolady», - dep jazdy oblystyq Polıtsııa departamentiniń bastyǵy Qaırat Dálbekov.
Esterińizge sala keteıik, jábirlenýshiniń anasy 25 mamyrda polıtsııaǵa 17 jasar qyzynyń joǵalǵany týraly habarlasqan. Atalǵan jaıt boıynsha QR QK-niń 125-baby «Adamdy urlaý» boıynsha sotqa deıingi tergeýdiń biryńǵaı tizilimine tirkelgen. Sodan keıin polıtsııa qyzdy bir kún boıy izdep, ata-anasyna qaıtarǵan. Bir aptadan keıin, ıaǵnı 31 mamyrda áıel taǵy da polıtsııaǵa kúdikti adamdarǵa qatysty urlaý jaıty boıynsha qylmystyq qýdalaýdy toqtatý týraly notarıaldy kýálandyrylǵan ótinishpen júgingen.
Al, 10 maýsymda aýyl turǵyny qaıtadan polıtsııaǵa júgingen. Bul joly qyzy joǵalǵan kezde ony 17 er adam zorlaǵan bolyp shyqqan.
Qylmystyń aýyrlyǵyn eskere otyryp, bul habarlama birden QR QK 120-baby 3-bóligi boıynsha polıtsııada tirkeldi. Saraptamalar taǵaıyndalǵan.
