Oqýshylary tońyp otyrǵan SQO mektebi úsh aýysymǵa aýystyryldy
Áleýmettik jelide SQO-daǵy mektepterdiń sýyqtyǵyna shaǵymdanýshylar qatary artty. Ata-analar synyp bólmelerinde temperatýranyń tómendigine narazy, oqýshylar arasynda aýrýshańdyq kóbeıgen. Turǵyndar Beskól aýylyndaǵy mektep-gımnazııada da balalardyń oqýyna tıisti jaǵdaı jasalmaǵanyn aıtýda.
Halyq shaǵymyna Qyzyljar aýdandyq bilim bólimi jaýap berdi.
«Beskól mektep-kolledjindegi jaǵdaıǵa baılanysty aıtar bolsaq, mekteptiń bir bóligi temperatýralyq rejımge saı kelse, ekinshi bóligindegi keı synyptarda – sýyq. Sondyqtan oqýshylar úsh aýysymǵa kóshirildi. Balalar jyly kabınetterge otyrǵyzyldy. Ol jerde temperatýra 19-22 S shamasynda.
Bul ýaqytsha shara, ǵımarattaǵy temperatýralyq rejım durystalǵan boıda, mektep qalypty oqytý formatyna kóshedi», - delingen habarlamada.
Bilim bólimi mamandarynyń aıtýynsha, oqý ordasynyń jeke áriptesi «Radýga» JShS mekteptiń sýyq bóliginde jaǵdaıdy jaqsartý úshin modýldi qazandyq ornatýǵa sheshim qabyldady. Daıyndyq jumystary bastalyp ketti.