Oqýshylarǵa qosymsha 300 myń kompıýter satyp alynady - Ashat Aımaǵambetov

NUR-SULTAN. QazAqparat - Mektep oqýshylary úshin qosymsha 300 myń kompıýter satyp alynady. Bul týraly QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

«Balalardy qashyqtan oqytý úshin 435 myń kompıýter ýaqytsha berildi. Bul máselemen ákimdikter aınalysyp jatyr. Jaqyn ýaqytta taǵy da 300 myńnan astam kompıýter jetkiziledi. Olardy da muqtaj azamattarǵa, balalarǵa beriletin bolady. Osy jumysty ary qaraı jalǵastyramyz», - dedi mınıstr Ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, elimizde ortasha eseppen 2 mln sabaq júrgiziledi.

«Kún saıyn balalar 70-80 mln ret onlaın sabaqtardy bilim berý platformalarynan kórip otyr. Bul óte úlken kórsetkish. Bir aptada 12 mln jeke qoldanýshy ınternet platformalardy paıdalanǵan. Endi aptasyna 6 kún sabaq oqıdy esek, kúnine 2 mıllıonǵa jýyq adam atalǵan platformalarǵa kirip, tıisti jumysyn istep jatqanyna kózimiz jetedi. Mysaly, Kúndelik platformasyna ǵana kúnine 700 myń baǵa qoıylady. Kúnine bir mıllıon tapsyrma beriledi. Munyń bári sabaqtyń júrgizilip jatqanyn jáne áriptesterimizdiń úlken eńbek atqaryp jatqanynyń belgisi», - dedi Ashat Aımaǵambetov.