Oqýshylardyń jeńisi taǵy bir altynmen jáne qolamen tolyqty

NUR-SULTAN. QazAqparat - Oqýshylarymyz halyqaralyq olımpıadalardaǵy jetistikterimen bizdi qýantýdy jalǵastyryp keledi. Olar Geografııadan halyqaralyq olımpıadada (IGeO-2022) 1 altyn, 1 qola medal jeńip aldy. Bul týraly Oqý-aǵartý mınıstri Ashat Aımaǵambetov áleýmettik jelidegi paraqshasyna jazdy, dep habarlaıdy QazAqparat.

Ulttyq qurama qorjynyna altyn medaldi Sanjar Hamıtov (Aqtóbe q.) ákelse, Erkebulan Tazabek (Shymkent q.) qola júldeni enshilegen.

«Bul elimizdiń bedeldi olımpıadaǵa qatysý tarıhyndaǵy qazaqstandyqtardyń ekinshi altyn medali ekenin atap ótkim keledi.

Bıyl zııatkerlik jarystardy Frantsııa uıymdastyrdy. Bul saıystarǵa álemniń 54 elinen 216 oqýshy qatysty.

Balalarymyzdyń matematıka, fızıka jáne endi geografııa pánderinen olımpıadalardaǵy joǵary jetistikteri olardyń básekege qabilettiligin kórsetedi.

Oqýshylardy jeńisimen quttyqtaımyn! Biz senderdi maqtan tutamyz. Sondaı-aq balalarǵa sapaly bilim berip jatqan ustazdarǵa sheksiz alǵysymdy bildirgim keledi. Daryndy balalardy tárbıelegen ata-analarǵa da rahmet», - delingen vedomstvo basshysynyń jazbasynda.

Ashat Qanatulynyń aıtýynsha, bıyl osyndaı olımpıadalardyń jeńimpazdary buryn-sońdy bolmaǵan qoldaý sharalaryna ıe bolady. Prezıdenttiń tapsyrmasy boıynsha qomaqty aqshalaı syıaqy tóleý jáne otandyq JOO-larǵa UBT tapsyrmaı-aq qabyldaý qarastyrylyp otyr. Altyn medal alǵan oqýshyǵa shamamen 4,5 mln teńge, kúmis medalǵa 3 mln-nan asa teńge, qola medalǵa 1,5 mln-nan asa teńge kóleminde aqshalaı syılyq beriledi. Oqýshylardy jarysqa daıyndaǵan ustazdar da tólemaqy alady.

Foto: www.facebook.com/askhat.aimagambetov