Oqýshylardyń jartysy mektep ashanasyna barǵysy kelmeıdi - Erlan Kanalımov
«Mekteptegi bastaýysh, orta, joǵary synyptar arasynda jasyryn saýalnama júrgizdik. Balalardyń jartysy mektep ashanasyna barǵysy kelmeıdi. Sondyqtan kún saıyn ata-anasynan aqsha suraıdy. Óıtkeni ár kúni birdeı taǵamdar beriledi, ıaǵnı sýǵa pisken makarondy, dámsiz kúrishti aldaryna qoıady. Atap aıtqanda, bul jaǵdaı keıbir mektepterde kezdesetini rastalyp otyr. Bul týraly baqylaý toptary, komıssııalar, ata-analar komıtetteri de aıtyp jatqan shyǵar. Balalardyń qarny toq bolǵanyn qalaımyz ǵoı. Sondyqtan tamaqtandyrý aqysyn 585 teńgege deıin (bir balany tamaqtandyrýǵa kún saıyn beriletin qarajat) kóterip jatyrmyz. Bul da qoldaý ǵoı? Osy oraıda bólingen qarjyǵa qaraı balalarǵa barynsha paıdasy bolýy tıis», - dedi Erlan Kanalımov elordadaǵy áleýmettik-mádenı damý máseleleri jónindegi turaqty komıssııanyń otyrysynda.
Onyń aıtýynsha, byltyr aýmaǵynda dúkenderi bar 17 bilim berý nysany tirkelgen.
«Mektep janyndaǵy dúkender balalarǵa zııan táttiler men sýsyndar satady. Bul máselege birjola núkte qoıý kerek. Mektepter tabys jasaıtyn oryn emes, bul jerde bilim berý kerek», - dedi máslıhat hatshysy.
Budan buryn habarlanǵandaı, byltyr jeltoqsan aıynda Astana qalasy kásipkerler palatasy bastaýysh synyptarǵa beriletin tegin tamaqtyń sapasy tómendep ketkenin málimdegen edi.
