Oqýshylardyń synyp tazalaýy: Elorda bilim basqarmasy túsinikteme berdi
NUR-SULTAN. QazAqparat - Bas qalamyzda qolǵan alynǵan mektep oqýshylarynyń synyp tazalaý tájirıbesine qatysty qalalyq bilim basqarmasy túsinikteme berdi, dep habarlaıdy QazAqparat.
«Sońǵy kúnderi elordalyq mektepterde byltyrdan bastap oryn alǵan bastamaǵa qatysty kóptegen pikirtalastar týyndaýda», - dep jazdy qalalyq bilim basqarmasynyń basshysy Ánýar Janǵozın óziniń Facebook paraqshasynda.
Bul - oqýshylarǵa mektep ǵımaratyn tazalaý kezinde tehnıkalyq qyzmetkerlerge kómek kórsetýine baılanysty kóterilgen másele. «Jalpy, bul ár oqýshy eden jýý kerek degen sóz emes, osyny birden atap ótkim keledi. Bastama ashanada ydystaryn jýatyn jerge aparý nemese sabaqtan keıin jumys ornyn taza ustaý, keıbir jaǵdaıda synyptar men dálizderdi jınaýǵa kómektesý sııaqty jumystar. Bul bizdiń balalarymyzdyń boıynda basqa adamdardyń eńbegin qurmetteý jáne qorshaǵan ortaǵa kútimmen qaraý daǵdylaryn damytý úshin jasalady»,- dep atap ótken Ánýar Janǵozın.
Onyń aıtýynsha, oqýshylardyń synyp tazalaý tájirıbesi olardyń qalaýy boıynsha júrgiziledi.
Sondaı-aq, bilim basqarmasynyń basshysy úlgi retinde óz kabınetin tazalap, jańa estafetany bastady.
«Tek syrttan baqylaýshy rólin atqarmas úshin, men búginnen bastap ár kesh saıyn óz kabınetimdi tazalaý arqyly tehnıkalyq qyzmetshilerdiń jumysyn jeńildetip, kómektesý týraly sheshim qabyldadym. Buǵan bylaı qaraǵanda 15-20 mınýt qana ýaqyt ketedi», - deıdi ol.
Sóz sońynda Á.Janǵozın #ózińnenbasta tazalyq estafetasyn elordalyq bilim berý uıymdarynyń basshylaryna joldady.
Eske sala ketsek, buǵan deıin elimizde oqýshylardyń synyp tazalaý tájirıbesiniń qaıta engiziletindigi týraly habarlaǵan bolatynbyz.
